मियामीमा मेसीलाई पहिलो सिजनमै उपाधि 

डेभिड बेकह्यामको लगानीमा रहेको इन्टर मियामीले लिग्स कपको फाइनलमा नास्भिलविरुद्ध टाइब्रेकरमा १०–९ को जित निकाल्यो

इंग्लिस फुटबलर डेभिड बेकह्यामको लगानीमा रहेको इन्टर मिलामी क्लब लिग्समा कप उपाधिविहीन थियो । युरोपमा नाम चलेका खेलाडी अनुबन्ध गरे पनि मियामीले लिग कपसँगै घरेलु लिगसमेत जित्न सकेको थिएन । डेढ महिनाअघि सातपटकको बालोन डिअर र विश्वकप विजेता खेलाडी लियोनल मेसीलाई अनुबन्ध गरेसँगै मियामीको भाग्य परिवर्तन भएको छ । वर्तमान समयकै उत्कृष्ट खेलाडी मेसीको उपस्थितिमै मियामीले लगातार सात खेलमा जित निकालेको छ । मेसीले लगातार खेलमा गोलसमेत गरेका छन् । 

आइतबार बिहान मियामीले निकालेको जित विशेष थियो । लिग कपको फाइनलमा मियामीले नास्भिल एससीलाई टाइब्रकेरमा १०–९ ले स्तब्ध पार्दै पहिलोपटक उपाधि चुम्यो । उपाधि भिडन्तको निर्धारित समयमा दुवै टोलीले १–१ को बराबरी खेलेका थिए । फाइनलमा मेसीले नै मियामीलाई अग्रता दिलाए । टाइब्रेकरमा मियामीले उपाधि जितेसँगै मेसीले करिअरकै ४४औँ ट्रफी उचाले । प्रतियोगितामा उनी नै उत्कृष्ट खेलाडी घोषित भए । मेसीले इतिहासमै सबैभन्दा बढी ट्रफी उचाल्ने खेलाडीमा ब्राजिलका ड्यानी अल्भेसको रेकर्ड तोडेका हुन् ।

थप एक उपाधिनजिक 
पेनाल्टी सुटआउटमा दुवै टिमका ११–११ खेलाडीले पेनाल्टी हानेका थिए । पेनाल्टीमा मेसीले नै सुरुवाती गोल गरे । रोमाञ्चक र नाटकीय पेनाल्टीको ११औँ प्रहार नास्भिलका गोलरक्षक इलियट प्यानिकोले गरेका थिए । मियामीका गोलकिपर ड्रेक कालेन्डरले उनको प्रहार छेक्दै उपाधि दिलाउन महŒवपूर्ण भूमिका निर्वाह गरे । ३६ वर्षीय मेसीले फाइनलमा डिबक्सभन्दा बाहिरबाट उत्कृष्ट गोल गरेका थिए । दोस्रो हाफमा फाफा पिकाउल्टले नास्भिललाई १–१ को बराबरीमा पु¥याए । यस सिजनमा मियामीले जोर्डी अल्बा र सर्जियो बुस्केटलाई अनुबन्ध गरेको थियो । 

बार्सिलोनाका पूर्वतीन खेलाडीको आगमनमा मियामी लगातार सात खेलमा अपराजित रह्यो । सन् २०२० पछि मियामीको यो पहिलो उपाधि हो । अब मियामीलाई अर्को प्रतियोगिताको फाइनल पुग्ने अवसर छ । आगामी बुधबार युएस ओपन कपको सेमिफाइनलमा मियामीको भेट सिन्सिनाटीविरुद्ध हुनेछ । 

मेसीको आगमनमा फेरिएको मियामी
मियामीका सह–मालिक बेकह्यामले स्टार खेलाडीहरूको खुलेर प्रशंसा गरेका छन् । ‘अहिले मलाई यो एउटा फिल्मजस्तो लागेको छ, एक महिनाअघि हामी कहाँ थियौँ र अहिले हामी कुन उचाइमा फुटबल खेलिरहेका छौँ,’ मेसीसँगै दुई बार्सिलोनाका खेलाडी आएपछिको अवस्थाबारे बेकह्यामले भने, ‘वास्तवमै फुटबलको मजा यही नै हो, खेलको स्तर कहिले माथि र तल झर्ने रहेछ ।’ 

बुस्केटले मियामीले दिनप्रतिदिन खेलमा सुधार गरेको प्रतिक्रिया दिए । ‘हामी अहिले संगठित रूपमा छौँ, सबैले जितको भावनाका साथ प्रतिस्पर्धा गरिरहेका छन्,’ उनले भने, ‘सबैभन्दा बलियो पक्ष हामीसँग विश्वकै उत्कृष्ट खेलाडीको साथ छ, जसको उपस्थितिले खेललाई सहज बनाएको छ ।’ 

अमेरिकाको एमएलएस र मेक्सिकोको शीर्ष डिभिजनको लिग खेल्ने क्लबबीच हुने लिग्स कप प्रतियोगितामा ४७ टोलीबीच प्रतिस्पर्धा भएको थियो । मियामीको यो नै पहिलो मुख्य उपाधि हो ।