धादिङमा बस दुर्घटना हुँदा २६ घाइते, तीनको अवस्था गम्भीर    

पृथ्वी राजमार्गअन्तर्गत धादिङको बेनिघाट रोराङ गाउँपालिका–९ हुग्दी खोला नजिक यात्रु बस दुर्घटना हुँदा २६ यात्रु घाइते भएका छन्। दाङकाे तुलसीपुरबाट काठमाडौंतर्फ आउँदै गरेको बागमती प्रदेश ०३-००१ ख २६७५ नम्बरको बस आज बिहान अनियन्त्रित भई सडकको दाहिने किनारातर्फ पल्टिएको छ। 

बिहान करिब ५ बजे भएको दुर्घटनामा परी घाइते भएका पाँचजनालाई उपचारका लागि काठमाडौं पठाइएको जिल्ला प्रहरी कार्यालय धादिङका प्रहरी नायब उपरीक्षक सन्तुलालप्रसाद जैसवारले जानकारी दिए। अन्य घाइतेको मलेखुस्थित राजमार्ग अस्पताल र नजिकका स्वास्थ्य संस्थामा उपचार भइरहेको छ।  

प्रहरी नायब उपरीक्षक जैसवारका अनुसार घाइते सल्यान सबेश्वरी-३ का २४ वर्षीय राजेन्द्र पुन, उनका छोरा ६ वर्षीय आशीष केसी र सल्यान जिल्ला बाघचौर नगरपालिका–१० का ५० वर्षीय मानबहादुर खड्काको अवस्था गम्भीर छ। यात्रु बस दुर्घटना भएपछि प्रहरी र स्थानीयले उद्धार गरेका थिए।