अर्थ प्रिन्ट संस्करण

अब आन्तरिक उत्पादन र रोजगारी वृद्धिमा जोड दिन्छौँ : प्रधानमन्त्री

सिएनआई २०औँ साधारणसभा

प्रधानमन्त्री पुष्पकमल दाहाल ‘प्रचण्ड’ले सरकार अब आन्तरिक उत्पादन र रोजगारी वृद्धिमा केन्द्रित हुने बताएका छन् । निजी क्षेत्रसँग हातेमालो गरेर सरकारले आन्तरिक उत्पादन र रोजगारी बढाउनमा ध्यानकेन्द्रित गर्ने उनको भनाइ छ ।

शुक्रबार नेपाल उद्योग परिसंघको २०औँ साधारणसभालाई सम्बोधन गर्दै उनले निजी क्षेत्रसँगको बलियो एकताविना उच्च आर्थिक समृद्धि सम्भव नहुने बताए । ‘पेट्रोलियम पदार्थ, उद्योगको कच्चा पदार्थ त आयात हुन्छ नै । नेपालमै उत्पादन हुने वस्तुको समेत खर्बाैँको आयात भइरहेको छ । दैनिक दुई हजारभन्दा बढी युवा वैदेशिक रोजगारमा गइरहेका छन्, यो दुःखद पक्ष हो,’ उनले भने, ‘तसर्थ, सरकार अब आन्तरिक उत्पादन र रोजगारी बढाउन केन्द्रित हुन्छ । यसमा नेपाल उद्योग परिसंघ र निजी क्षेत्रको पनि सहयोग हुन्छ भन्ने आशा छ ।’ 

उनले सार्वजनिक–निजी साझेदारी (पिपिपी) मोडेलमा औद्योगिक क्षेत्र सञ्चालन गर्ने विषयमा सरकार स्पष्ट भएको पनि बताए ।  त्यसका लागि पहिलो चरणमा चिवतनको शक्तिखोर वा मकवानपुर औद्योगिक क्षेत्रको निर्माणलाई पिपिपी मोडेलमा अगाडि बढाउने उनको भनाइ थियो । यसलाई जति सक्दो छिटो कार्यान्वयनमा लैजाने उनले बताए । 

यस्तै, उनले आगामी आवको बजेटलाई विशेष रूपमा कार्यान्वयन गरिने पनि उनले बताए । ‘नेपालमा बजेटको कार्यान्वयन पक्ष कमजोर छ । तर, आगामी आवको बजेटलाई सफल रूपमा कार्यान्वयन गर्ने गरी विशेष कार्ययोजना बनाउँदै छौँ,’ उनले भने, ‘त्यस क्रममा निजी क्षेत्र तथा सरोकारवालाबाट आएको टिप्पणी, आलोचनालाई पनि सकेसम्म सम्बोधन गर्नेछौँ ।  

उनले विकासको मोडेलबारे गम्भीर रूपमा छलफल गर्न आवश्यक रहेको पनि उनले बताए । साथै, नीति–नियममा गुणात्मक रूपमा सुधार गर्नुपर्ने उनको भनाइ थियो । ‘हामीले जुन हिसाबमा देशको विकास गर्न खोजेका छाँै, यो प्रचलित ऐन–कानुनबाट सम्भव छैन,’ उनले भने, ‘तसर्थ, यसमा गम्भीर रूपमा छलफल गरेर नीति–नियमहरूमा गुणात्मक रूपमा सुधार गर्नुपर्छ । समग्रमा सरकारले आर्थिक विकासका लागि आफ्नो शक्ति लगाएको छ ।’

परिसंघका अध्यक्ष विष्णु अग्रवालले परिसंघले सञ्चालन गरेको मेक इन नेपाल स्वदेशी अभियान निकै प्रभावकारी भएको बताए । यसले अर्थतन्त्रको विकासमा राम्रो योगदान दिएको उनको भनाइ थियो । हालसम्म उक्त अभियानमा एक सय १४ वटा स्वदेशी कम्पनी आबद्ध भएको उनले जानकारी दिए । आगामी दिनमा आबद्ध सदस्य संख्या बढाउँदै आबद्ध सदस्य उद्योग तथा कम्पनीको क्षमताको विकास गरिने उनले बताए । यसबाट १५ हजार प्रत्यक्ष र अप्रत्यक्ष रूपमा ५० हजार रोजगारी सिर्जना गरेको उनले दाबी गरे ।    

उनले अप्ठ्यारो अवस्थामा रहेको अर्थतन्त्रलाई उकास्ने गरी आगामी आर्थिक वर्षको बजेट आउनु स्वागतयोग्य भएको बताए । तर, तेलको कच्चा पदार्थमा लाग्ने भन्सारदर एक प्रतिशतबाट १० प्रतिशत पुर्‍याउने, करको नयाँ दायित्व सिर्जना गर्ने, विलासिता कर र हवाई टिकटमा भ्याट लगाउनु दुःखद पक्ष भएको उनको भनाइ थियो । 

परिसंघका संस्थापक अध्यक्ष विनोद चौधरीले अप्ठ्यारो अवस्थामा रहेको अर्थतन्त्रलाई समाधान गर्न सरकार अग्रसर हुनुपर्ने बताए । यसका लागि निजी क्षेत्र र सरकारले सहकार्य गरेर समाधानमा अग्रसर हुनुपर्ने उनको भनाइ थियो । अर्थतन्त्रलाई चलायमान कर्जाको ब्याजदर घटाउनुपर्नेमा जोड दिँदै उनले भने, ‘बैंकमा निक्षेप थुप्रिएको छ । तर, बैंकहरूले कर्जा प्रवाह बढाउन सकेका छैनन् । त्यसको कारण हो, उच्च ब्याजदर ।’ 

अर्थमन्त्री डा. प्रकाशशरण महतले सरकार बजेटको कार्यान्वयनमा अग्रसर भएको बताए । ‘नेपालको मुख्य समस्या भनेको नै बजेट कार्यान्वयन हो । बजेट कार्यान्वयनको इतिहास राम्रो छैन,’ उनले भने, ‘तर, आगामी बजेटलाई सफल रूपमा कार्यान्वयनमा लैजाने गरी कार्यतालिका बनाएका छौँ । बिहीबार मात्रै सबै मन्त्रालयका सचिवहरूसँग बजेट कार्यान्वयनबारे छलफल गरेको छु । उहाँहरूलाई तोकिएको समय तालिकाअनुसार नै बजेट कार्यान्वयन गर्न भनेको छु, त्यसमा कुनै छुट हुँदैन ।’ 

उनले मर्जर र एफपिओ जारी गर्दा भएको अतिरिक्त आम्दानीमा कर लाग्ने व्यवस्था वैधानिक भएको पनि उनले बताए । ‘धेरै व्यवसायी साथीहरूले मर्जर र एफपिओमा भएको अतिरिक्त आम्दानीमा कर लगाएको भनेर टिप्पणी गर्नुभएको छ । साथै, त्यो व्यवस्था हटाउन पनि माग गर्नुभएको छ, जुन काम मबाट हुँदैन,’ उनले भने, ‘महालेखाले भनेअनुसार नै त्यसमार्फत कर उठाउन खोजिएको हो, त्यसलाई मैले अस्वीकार गर्न मिल्दैन ।’

परिसंघले मन्दीदेखि समृद्धि, लगानीमा अभिवृद्धि भन्ने नारासहित २०औँ साधारणसभा आयोजना गरेको हो । परिसंघको यो साधारणसभाले नयाँ कार्यसमिति पनि चयन गर्नेछ । परिसंघले साधारणसभाको अवसरमा सबैभन्दा बढी निर्यात गर्ने तिलराज खतिवडा, वासु गोल्यान, अमित मोरलाई सम्मान गरेको छ । यस्तै, अनुसन्धानमा सहयोग गरेबापत सूर्य नेपाल प्राइभेट लिमिटेडलाई पनि सम्मान गरिएको छ । यसैगरी, प्रेसिडेन्ट अवार्डबाट विवेककुमार संघाई र शशिकान्त अग्रवाललाई सम्मान गरिएको छ ।