- वि.सं २o८o असार ६ बुधबार
शनिबार मुटुको चालमा समस्या देखिएपछि अस्पताल भर्ना गरिएका राष्ट्रपति रामचन्द्र पौडेलको मुटुको शल्यक्रिया गरिएको छ । महाराजगन्जस्थित मनमोहन कार्डियो थोरासिक भास्कुलर एन्ड ट्रान्सप्लान्ट सेन्टरमा मंगलबार शल्यक्रिया गरिएको हो । स्वास्थ्य अवस्था सामान्य रहेको अस्पतालले जनाएको छ ।
ट्रान्सप्लान्ट सेन्टरका कार्यकारी निर्देशक प्रा.डा. रत्नमणि गजुरेलका अनुसार विशेषज्ञहरूको रायअनुसार स्थायी पेसमेकर राखिएको हो । ‘७२ घन्टाको नियमित निगरानीका क्रममा मुटुको चाल वेलाबखतमा कम हुने देखिएकाले विशेषज्ञहरूको रायबमोजिम पेसमेकर राख्नुपर्ने देखिएकाले सफलतापूर्वक स्थायी पेसमेकर राखिएको छ । स्वास्थ्य अवस्था सामान्य रहेको छ,’ अस्पतालको विज्ञप्तिमा छ ।
राष्ट्रपतिका निजी चिकित्सक नीरज बमले राष्ट्रपतिमा देखिएको समस्या जटिल प्रकृतिको नभएको बताए । उनले उमेरसँगै मुटुको चालमा देखिने समस्याको सहजताका लागि पेसमेकर राखिएको बताए । ‘उमेरसँगै मुटुको चालमा समस्या देखिन्छ । चाललाई नियमित र सक्रिय बनाउन पेसमेकर राख्नुपरेको हो । जटिल प्रकृतिको समस्या होइन,’ उनले नयाँ पत्रिकासँग भने ।
राष्ट्रपतिको सचिवालयका अनुसार अझै केही दिन उनलाई अस्पतालमा नै राखिनेछ । ‘चिकित्सकका अनुसार केही दिन अझै निगरानीमा राख्नुपर्ने हुन्छ,’ राष्ट्रपतिका प्रेसविज्ञ किरण पोखरेलले भने । गत मंगलबार पनि मुटुमा समस्या देखिएपछि उनलाई बाँसबारीस्थित गंगालाल राष्ट्रिय हृदयरोग केन्द्रमा भर्ना गरिएको थियो । गंगालालमा उनको एन्जिओग्राम गरिएको थियो । त्यहाँबाट उनी बुधबार मात्र डिस्चार्ज भएका थिए ।
त्यसअघि १८ चैतमा उनको पेटमा समस्या देखिएपछि त्रिवि शिक्षण अस्पतालमा उपचार गरिएको थियो । ६ वैशाखमा पेटमा समस्या देखिएपछि महाराजगन्जस्थित त्रिवि शिक्षण अस्पताल भर्ना गरिएको थियो । त्यहाँ उपचार हुन नसकेपछि थप उपचारका लागि भारत लगिएको थियो । नयाँदिल्लीस्थित अल इन्डिया इन्स्टिच्युट अफ मेडिकल साइन्सेस (एम्स)मा उपचार भएको थियो । उपचारपछि १८ वैशाखमा उनी स्वदेश फर्किएका थिए ।
