- वि.सं २o८o जेठ १५ सोमबार
सरकारले आगामी आर्थिक वर्षमा पनि सामुदायिक विद्यालयमा सञ्चालित दिवा खाजा कार्यक्रमलाई निरन्तरता दिने भएको छ ।
सरकारले आगामी आर्थिक वर्षमा उक्त कार्यक्रमका लागि आठ अर्ब ४५ करोड रुपैयाँ विनियोजन गरेको छ ।
अर्थमन्त्री डा. प्रकाशशरण महतले संघीय संसद्को संयुक्त बैठकमा आगामी आर्थिक वर्ष ०८०/८१ का लागि विनियोजित बजेट प्रस्तुत गर्दै यस्तो घोषणा गरेका हुन् ।
सरकारले बजेटमार्फत विद्यार्थीलाई दिइने दिवा खाजामा जंकफुड दिन नपाइने व्यवस्था कडाइका साथ लागू गर्ने घोषणा गरेको छ ।
दिवा खाजामा स्थानीय तथा रैथाने कृषि उपजबाट तयार गरिएको पौष्टिक आहार उपलब्ध गराउने व्यवस्था मिलाइने अर्थमन्त्री महतले उल्लेख गरे ।
