- वि.सं २o८o जेठ ८ सोमबार
प्रतिनिधिसभा सदस्य प्रदीप पौडेलले इन्टरनेट सेवा प्रदायकहरूले मूल्य बढाउन लागेको भन्दै मूल्यवृद्धि रोक्न माग गरेका छन्।
सोमबार प्रतिनिधिसभा बैठकको शून्य समयमा बोल्दै उनले सेवामा गुणस्तरीयता र निरन्तरता नभए पनि मिलेमतोमा मूल्य बढाउन लागिएको भन्दै आपत्ति जनाएका हुन्। सेवा अवरुद्ध हुँदा सोबराबरको सेवा प्रदान गर्ने वा सो अवधिको शुल्क नलाग्ने सर्तसमेत पालना नभएको सांसद पौडेलले औँल्याए।
‘इन्टरनेटको उपलब्ध सेवामा गुणस्तरीयता, गति, क्षमता, निरन्तरता केही पनि छैन। सेवा अवरुद्ध हुँदा अवधिबराबरको सेवा प्रदान गर्ने वा अवरुद्ध अवधिको शुल्क नलाग्ने सर्तसमेत पालना गरिएको छैन। इन्टरनेट सेवा प्रदायकहरूले रातारात मिलेर मूल्य बढाउन लागिरहेका छन् भन्ने सुन्नमा आएको छ। तसर्थ, इन्टरनेट कम्पनीहरूले मिलेमतोमा बढाउने अनुचित मूल्यलाई तत्काल रोक्न र उनीहरूलाई स्वस्थ प्रतिस्पर्धाबाट गुणस्तरीय सेवा उपलब्ध गराउने वातावरण निर्माण गर्न म सरकारको ध्यानाकर्षण गर्न चाहन्छु,’ उनले भने।
