वीर गणेशमान सिंह राष्ट्रव्यापी बक्सिङ च्याम्पियनसिप राजधानीमा सुरु भएको छ। वीर गणेशमान सिंह स्पोर्टस् कमिटीको आयोजनामा लैनचौरस्थित राष्ट्रिय टेबल टेनिस प्रशिक्षणको हलमा मंगलबारबाट प्रतियोगिता सुरु भएको हो।

प्रतियोगितामा महिला र पुरुषतर्फ विभिन्न ६ तौल समूहमा खेलाडीले प्रतिस्पर्धा गर्दै छन्। चैत २५ गतेसम्म सञ्चालन हुने प्रतियोगितामा कुल १० टोलीका १ सय ४० खेलाडीले प्रतिस्पर्धा गर्नेछन्।

प्रत्येक विधाका विजेताले २५ हजार, उपविजेताले १५ हजार र तेस्रो स्थानको खेलाडीले ७ हजार ५ सय रुपैयाँ प्राप्त गर्नेछन्। जसअन्तर्गत पुरुषतर्फ ५१, ५७, ६३.५, ७१, ८० र ९२ केजी तौल समूह र महिलातर्फ ५०, ५४, ५७, ६०, ६८ र ७५ केजी तौल समूहमा प्रतिस्पर्धा हुँदै छ।

प्रतियोगितामा तीन विभागीय टोलीका साथै सात प्रदेशका खेलाडीले सहभागिता जनाएका छन्। प्रतियोगिताको उद्घाटन नेपाली कांग्रेसका नेता प्रकाशमान सिंहले गरेका हुन्।