छात्राभन्दा छात्रको संख्या बढी, जापानबाट १४ विद्यार्थी परीक्षा दिँदै

शुक्रबारदेखि सुरु हुन लागेको यस वर्षको माध्यमिक शिक्षा परीक्षा (एसइई)मा पाँच लाख १६ हजार पाँच सय ९१ परीक्षार्थी सहभागी हुँदै छन् । तीमध्ये १४ जना जापानबाट एसइईमा सहभागी हुन लागेका हुन् । 

विष्णुनारायण श्रेष्ठ परीक्षा नियन्त्रक, एसइई
एसइई परीक्षामा दुई लाख  ६० हजार ६७४ छात्र र दुई लाख ५५ हजार ९१७ छात्रा सहभागी हुँदै छन् । उत्तरपुस्तिका हरेक परीक्षा केन्द्रमा पुगेको छ, प्रश्नपत्र केन्द्रको नजिक रहेको सुरक्षा केन्द्रमा पुगेको छ ।

एसइईका परीक्षा नियन्त्रक विष्णुनारायण श्रेष्ठका अनुसार पाँच लाख १६ हजार पाँच सय ९१ परीक्षार्थीका लागि देशभरका ७७ जिल्लामा दुई हजार ३६ परीक्षा केन्द्र कायम गरिएको छ । जापानी विद्यार्थीका लागि जापानमै केन्द्र राखिएको छ । 

यस वर्ष छात्राभन्दा छात्रको संख्या बढी पाइएको छ । श्रेष्ठका अनुसार दुई लाख ६० हजार ६ सय ७४ छात्र र दुई लाख ५५ हजार नौ सय १७ छात्रा सहभागी हुँदै छन् । 
परीक्षाको सम्पूर्ण तयारी पूरा भएको नियन्त्रक श्रेष्ठले बताए । उनले भने, ‘उत्तरपुस्तिका हरेक परीक्षा केन्द्रमा पुगेको छ, प्रश्नपत्र केन्द्रको नजिक रहेको सुरक्षा केन्द्रमा पुगेको छ ।’

पनिकाका अनुसार सबैभन्दा धेरै विद्यार्थी तथा परीक्षा केन्द्र बागमती प्रदेशमा र सबैभन्दा कम कर्णाली प्रदेशमा छन् । बागमती प्रदेशमा चार सय ३४ परीक्षा केन्द्र र एक लाख ६ हजार नौ सय ५९ विद्यार्थी रहेका छन् । 

सबैभन्दा कम रहेको कर्णालीमा एक सय ७९ परीक्षा केन्द्र र परीक्षार्थी ४१ हजार तीन सय २९ रहेको बोर्डले जनाएको छ । त्यसैगरी, कोसी प्रदेशमा तीन सय ७८, मधेसमा दुई सय ७९, गण्डकीमा दुई सय २३, लुम्बिनीमा तीन सय ३४ र सुदूरपश्चिम प्रदेशमा दुई सय नौ परीक्षा केन्द्र तय गरिएको छ । 

अघिल्लो वर्षको एसइईमा देशभरबाट पाँच लाख १८ हजार एक सय ८५ विद्यार्थीले आवेदन भरेकामा चार लाख ९५ हजार ६ सय ४८ जना परीक्षामा सहभागी भएका थिए । 

जापानबाट सहभागी हुने विद्यार्थी को हुन् ? 
राष्ट्रिय परीक्षा बोर्डको परीक्षा नियन्त्रण कार्यालयका अनुसार जापानमा श्रम गर्न गएकाका छोराछोरीले जापानबाट एसइई दिन लागेका हुन् । जापान सरकारको अनुमति लिएर नेपाली पाठ्यक्रम सञ्चालन गरेको शैक्षिक संस्थाबाट परीक्षामा सहभागी हुन लागेका हुन् । बोर्डले उत्तरपुस्तिका जापान पठाइसकेको छ भने प्रश्नपत्र परीक्षाको दिन इमेलमार्फत पठाउने जनाएको छ । जापानका १४ विद्यार्थीका लागि टोक्योमा एउटा परीक्षा केन्द्र कायम गरिएको छ ।