मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
रामकृष्ण थापा सिन्धुपाल्चोक
२०७९ फाल्गुण ४ बिहीबार १२:२७:००
Read Time : > 1 मिनेट
समाचार डिजिटल संस्करण

तीन वर्षपछि तातोपानीमा नेपाल–चीन अधिकारीकाे बैठक सम्पन्न

Read Time : > 1 मिनेट
रामकृष्ण थापा, सिन्धुपाल्चोक
२०७९ फाल्गुण ४ बिहीबार १२:२७:००

तीन वर्षपछि तातोपानी मितेरीपुलमा नेपाल र चीनका सरकारी अधिकारीहरूबीच ‘फेस टु फेस’ बैठक सम्पन्न भएको छ । नेपालबाट सिन्धुपाल्चोक जिल्ला प्रशासन, अध्यागमन, सुरक्षा निकाय, भन्सारका प्रमुख तथा चीनबाट न्यालम काउन्टी प्रशासन, सुरक्षा निकाय, अध्यागमनलगायत अधिकारीहरूबीच बैठक भएको हो ।

कोरोना महामारीको समयमा वि च्याटमार्फत अधिकारीहरूबीच भर्चुअल मिटिङ हुन्थ्यो । ‘सीमामा कोरोनाको डर नभएकाले भौतिक रूपमा बैठक गर्न सकियो,’ सिन्धुपाल्चोकका प्रमुख जिल्ला अधिकारी रमेश न्यौपानेले भने । तीन वर्षपछि यसरी प्रत्यक्ष बैठक सम्पन्न हुनु महत्वपूर्ण काम भएको उनले प्रस्ट्याए । भर्खरै जिल्ला आएका न्यौपानेले नाका पूर्ववत् सञ्चालनका लागि पहलकदमी बढाएका हुन् ।

आयात मात्रै भइरहेको तातोपानीबाट निर्यात खुलाउन चीन सरकार सकारात्मक छ । तर, कहिलेदेखि दुईतर्फी नाका सञ्चालन गर्ने भन्नेबारे सहमति भएको छैन । निकासी पनि खुलाउने गरी छलफल सुरु भएको बताइएको छ । यो प्रारम्भिक छलफल भएको अध्यागमन कार्यालय कोदारीका प्रमुख दीपक अधिकारीले बताए । ‘काउन्टर पार्टमा दुवै देशका स्थानीय अधिकारीबीच दोहोरो संवाद भएको छ,’ उनले भने ।

बैठकमा चिनियाँ अधिकारीहरूले तातोपानी नाका पूर्ववत् सञ्चालनका लागि के गर्न सकिन्छ भनेर नेपालका अधिकारीसँग सुझाव मागेका छन् । निकासी वस्तुको चेकजाँच गर्न खासाको रमितेमा निकासी घर निर्माणाधीन रहेको पनि उनीहरूले नेपाली पक्षलाई जानकारी दिए । बैठकमा नाका सञ्चालन हुनुपूर्व ‘क्रस बोर्डर क्राइम’बारे पर्याप्त छलफल हुनुपर्नेमा अधिकारीबीच समान धारणा रहेको छ ।

बैठकमा दुवै देशका अधिकारीले खुलेर नाकासम्बन्धी धारणा राखेका थिए । नेपालबाट प्रजिअ न्यौपाने र चीनबाट न्यालम अध्यागमन इन्स्पेक्सन स्टेसनका प्रमुख सियाङ जुनले धारणा राखेका थिए । मिटिङमा सीमा सुरक्षा सशस्त्र प्रहरीका एसपी रवि केसी, जिल्ला प्रहरी प्रमुख एसपी बालनरसिंह राणालगायत सहभागी थिए । चीनबाट बोर्डर कन्ट्रोल प्रमुख सु गाङ, खासा अनुसन्धान प्रमुख  गे साङ, सहायक प्रमुख युन डान, न्यालम र खासा प्रहरी स्टेसनका प्रमुखद्वय डान डुओ र जियान क्यान, न्यालम कानुन तथा अनुसन्धान प्रमुख जिया सी डुनझुलगायत सहभागी थिए ।

भूकम्पपछि ०७६ जेठ १५ मा नाका एकतर्फी सञ्चालन भएको थियो । तर, ११ चैतमा कोरोना भाइरस नियन्त्रण गर्न देशभर लकडाउनको घोषणा गरेपछि तातोपानी नाकाबाट हुने आयात वर्ष दिनजति रोकिएको थियो । ०७७ मा दुवै देशका स्थानीय अधिकारीले मितेरीपुलमा पाँच मिटर टाढा रहेर बैठक गरेका थिए । त्यसपछि यो नै पहिलो प्रत्यक्ष बैठक हो । नाका सञ्चालनका लागि यसै क्षेत्रका सांसद माधव सापकोटाले नेपालका लागि चिनियाँ राजदूत छन् सोङसँग कुराकानी गरेका छन् । सोङलाई तातोपानी नाकामा अवलोकन भ्रमण गराउने सापकोटाको योजना छ ।