खेलकुद प्रिन्ट संस्करण

रोनाल्डोले गुमाए साउदीमा पहिलो उपाधि जित्ने मौका

एसियन भूमिमा क्लबस्तरीय करिअर अगाडि बढाउन आएका रोनाल्डो सम्मिलित अल नासेर सुपर कपको सेमिफाइनलबाट बाहिरियो 

पोर्चुगलका स्ट्राइकर क्रिस्टियानो रोनाल्डोले नयाँ क्लब अल नासेरमा पहिलो उपाधि जित्ने मौका खेर फालेका छन् । रोनाल्डो आबद्ध अल नासेर साउदी सुपर कपको सेमिफाइनलमा अल इतिहादसँग ३–१ ले स्तब्ध भयो । यसै सिजनमा युरोपियन क्लबहरूले अनुबन्ध नगरेपछि रोनाल्डो एसियन भूमिमा क्लबस्तरीय करिअर अगाडि बढाउन साउदी अरेबिया पुगेका हुन् । विश्व फुटबलमै कीर्तिमानी रकममा अल नासेरले रोनाल्डोलाई अनुबन्ध गरेको थियो । 

रोनाल्डोले युरोपियन भूमिमा प्राप्त अनुभव एसियामा बाँड्ने मनसाय बोकेर साउदी अरेबियामा नयाँ भविष्य खोजेका छन् । तर, उनले अल नासेरबाट पहिलो उपाधि जित्ने सपना पूरा गर्न सकेनन् । साउदी अरेबियाकै धनी क्लब अल नासेरका प्रशिक्षक रुडी गार्सियाले टोली सेमिफाइनलबाट बाहिरिनुपछाडि कप्तान रोनाल्डोमाथि दोष लगाएका छन् । 

हारको दोष रोनाल्डोलाई 
प्रतिस्पर्धाको पहिलो हाफमै रोनाल्डोले सहज गोलको अवसर प्राप्त गरेका थिए । डिबक्सभित्र ओपन गोल गर्न सक्ने अवस्थामा रोनाल्डो चुकेका थिए । ‘पहिलो हाफमा रोनाल्डोले सहज गोल गर्न सक्थे, तर उनले गोल गरेनन्, हामी सुपर कपबाट बाहिरिनुको पहिलो कारण नै कप्तान रोनाल्डोको फितलो प्रदर्शन थियो,’ निराश देखिएका रुडीले भने । इतिहादका लागि रोमारिन्हो, हम्दाल्लाह र मोहमदले गोल गरेका थिए । अल नासेरका लागि एन्डरसन टालिस्काले मात्र एक गोल गरेका थिए । 

इतिहादले काउन्टर अट्याकमा अल नासेरमाथि दबाब राखेको थियो । ‘खेलको रूप नै परिवर्तन भयो, रोनाल्डोले त्यो अवसर सदुपयोग गरेको भए खेल हाम्रो पक्षमा पनि हुन्थ्यो,’ अल नासेरका प्रशिक्षक रुडीले भने । प्रतिस्पर्धामा अल नासेरले नै बल पोसेसन बनाएको थियो । तर, इतिहासले बलियो डिफेन्स बनाउँदा अल नासेरले गोल गर्न सकेन । खेलको १५औँ मिनेटमा रोमारिन्होले इतिहादलाई १–० को अग्रता दिलाए । खेलको ४३औँ मिनेटमा मोरक्कोका खेलाडी हमदल्लाहले इतिहासलाई २–० को स्थितिमा राखे । खेलको ६७औँ मिनेटमा टालिस्काले अल नासेरलाई २–१ को अवस्थामा राखी खेलमा फर्कने संकेत दिए । 

नयाँ नियम 
खेलको अन्तिम इन्जुरी समयमा मोहमदले इतिहादको जित ३–१ ले पक्का पारे । यसपटक नयाँ नियम लागू भएका कारण अल नासेरले सुपर कपमा प्रतिस्पर्धा गर्ने अवसर पाएको हो । पछिल्लो समय दुई टोली खेल्ने सुपर कपमा यसपटक चार टोली छन् । लिग र किंग्स कपको शीर्ष दुई टोली छनोट हुने व्यवस्था गरिएको थियो । अल हिलाल लिग विजेता र कप उपविजेता रहेकाले लिगको तेस्रो स्थानमा रहेको अल नासेरले मौका पाएको हो ।