- वि.सं २o८२ भदौ १७ मंगलबार
कर्णाली नदीको बहावले गेरुवा गाउँपालिका– २, बनघुस्रामा तटबन्ध भत्किएको स्थानमा बिग बोल्डर (ठुला ढुंगा)को प्रयोग गरी तटबन्ध निर्माण थालिएको छ। सिँचाइ तथा जलस्रोत व्यवस्थापन आयोजना राजापुरले तटबन्ध भत्किएको स्थानमा बिग बोल्डर (ठुला ढुंगा)ले तटबन्ध निर्माण थालिएको जनाएकाे छ ।
सोमबार स्थानीय, नेपाली सेना, सशस्त्र प्रहरी बल, नेपाल प्रहरी दिनभर काम गरेको स्थानमा आज आयोजना बिग बोल्डर (ठुला ढुंगा) प्रयोग गरी कटान रोक्ने काम थालिएको सिँचाइ तथा जलस्रोत व्यवस्थापन आयोजना राजापुरका प्रमुख सुदिन मोक्तानले बताए ।
उनले भने, ‘नदीले कटान गरेको ठाउँमा आपतकालीन तटबन्ध निर्माणका लागि कैलालीबाट बिग बोल्डर (ठुला ढुंगा) ल्याइएको छ । बिग बोल्डर पर्याप्त मात्रामा पाइए दुई/तीन दिनमा कटान भएको ठाउँमा बचाउन सकिन्छ ।’
कर्णाली नदीमा पानीको सतह बढेसँगै वनघुस्रा कटान भएको ठाउँमा रोकथाम गर्न नसकेमा गेरुवा गाउँपालिका २ र ३ वडाका बनघुस्रा, बनकट्टी, सनकट्टी, हिमालीपुर मुगहवा टिकुलीगढ, लोहारपुर र राजापुर नगरपालिका १ को दौलतपुर जोखिममा रहेको छ ।
