अन्तर्राष्ट्रिय समुदायलाई सुदूरपश्चिममा लगानी गर्न परराष्ट्रमन्त्री देउवाको संयुक्त आग्रह

परराष्ट्रमन्त्री डा. आरजु राणा देउवा र सुदूरपश्चिम प्रदेशका मुख्यमन्त्री कमलबहादुर शाहले अन्तर्राष्ट्रिय समुदायलाई निर्धक्क भएर सुदूरपश्चिम प्रदेशमा लगानी गर्न आग्रह गरेका छन् ।

सुदूरपश्चिम प्रदेश सरकारको आयोजनामा हुन लागेको लगानी तथा विकास सम्मेलनसम्बन्धी छलफल कार्यक्रममा परराष्ट्रमन्त्री देउवा र मुख्यमन्त्री शाहले संयुक्त रूपमा प्रदेशमा लगानी गर्न आग्रह गरेका हुन् ।

‘हामीसँग सीमित पूर्वाधार, न्यून लगानी, रोजगारीको सीमित अवसरजस्ता चुनौतीहरू विद्यमान छन् । यी चुनौतीलाई अवसरमा बदल्नका लागि हामीले वैकल्पिक सोच, साझेदारी र दिगो लगानीलाई प्राथमिकता दिएका छौँ,’ मुख्यमन्त्री शाहले भने, ‘प्रदेशको सम्भावनालाई राष्ट्रिय र अन्तर्राष्ट्रिय जगतमा उजागर गर्नु छ । हामी त्यो प्रयासमा छौँ । सबै निकायलाई सुदूरपश्चिममा लगानी गर्न आह्वान गर्दछौँ ।’

मुख्यमन्त्री शाहले निजी क्षेत्र र विकास साझेदार संस्थासँग सहकार्य बलियो बनाउँदै लगानी भित्र्याउने गरी प्रदेश सरकार लागिरहेको बताएका थिए ।

‘आवश्यक नीति तथा संस्थागत सुधारमार्फत लगानीमैत्री वातावरण निर्माण गर्नु र ठोस परियोजनाहरूलाई अगाडि बढाउनु हाम्रो दायित्व हो,’ मुख्यमन्त्री शाहले भने, ‘सम्मेलनमा पूर्वाधार, पर्यटन, कृषि, औद्योगिक विकास, ऊर्जा, सूचना प्रविधि, शिक्षा र स्वास्थ्य क्षेत्रका प्राथमिक परियोजनाहरू प्रस्तुत गरिनेछ ।’

छलफलमा परराष्ट्रमन्त्री आरजु राणा देउवाले सुदूरपश्चिम प्रदेशको विकास र समृद्धिका लागि संघीय सरकार सधैँ तत्पर रहेको बताइन् । आफू पनि सुदूरपश्चिमको प्रतिनिधि भएको भन्दै उनले अन्तर्राष्ट्रिय समुदायलाई त्यहाँ लगानी गर्न आग्रह गरिन् ।

‘सुदूरपश्चिम प्रदेशमा प्रशस्त सम्भावना रहेका छन् । म पनि त्यहाँकी प्रतिनिधि हुँ,’ उनले भनिन्, ‘संघीय सरकार सुदूरपश्चिमको विकास र समृद्धिका लागि प्रतिबद्ध छ । तपाईंहरूले ढुक्क भएर लगानी गर्नुहोस् ।’

शेरबहादुर देउवा प्रधानमन्त्री भएपछि सुदूरपश्चिम प्रदेशमा २२ वटा पुल बनेको स्मरण गराउँदै उनले कांग्रेस अहिले पनि देश र प्रदेशको विकासका लागि लागिरहेको बताइन् ।

परराष्ट्र मन्त्रालयमा आयोजित कार्यक्रममा नेपालमा कार्यरत विभिन्न मित्रराष्ट्रका राजदूत, कूटनीतिक नियोगका प्रमुख तथा प्रतिनिधिहरू, संयुक्त राष्ट्र संघका प्रतिनिधि तथा विकास साझेदार संघ–संस्था, अन्तर्राष्ट्रिय वित्तीय संस्थाका पदाधिकारीहरू सहभागी थिए । उनीहरूले लगानी सुदूरपश्चिममा लगाउन आफूहरू तयार रहेको भन्दै नीतिगत विषयमा जोड दिन सरकारलाई सुझाव दिएका थिए ।

मंसिर १ र २ गते सुदूरपश्चिममा लगानी तथा विकास सम्मेलन हुँदै छ । सुदूरपश्चिम प्रदेश सरकार अहिले संघीय राजधानीमा लगानीकर्तालाई प्रदेशमा लगानी ल्याउन आग्रह गरिरहेको छ । आजै संस्कृति, पर्यटन तथा नागरिक उड्डयन मन्त्रालयमा र हिजो उद्योग, वाणिज्य तथा आपूर्ति मन्त्रालयमा पनि प्रदेशमा लगानी ल्याउने विषयमा लगानीकर्तासँग छलफल गरिएको थियो ।

औषधिजन्य जडीबुटी, कृषिजन्य उत्पादन, जलविद्युत्, पर्यटकीय सम्पदा, खनिज स्रोत र मानव स्रोतको सही परिचालन गर्न सके सुदूरपश्चिमको स्रोतले प्रदेश मात्र नभई देशको पनि समृद्धिको रेखा कोर्ने सहभागीहरूले बताएको लगानी तथा विकास सम्मेलनका प्रचार समिति संयोजक शिवसिंह ओलीले जानकारी दिए ।