- वि.सं Invalid date format
राष्ट्रिय खेलकुद परिषद् (राखेप)ले आफ्नो ६२औँ वार्षिकोत्सवका अवसरमा राष्ट्रिय पुरुष र महिला खोखो टोलीलाई उत्कृष्ट अवार्डसहित शुक्रबार पुरस्कृत गरेको छ।
सिनियरतर्फ पुरस्कृत भएका दुवै टोलीलाई एक लाख रुपैयाँसहित ट्रफी प्रदान गरिएको छ। दुवै टिमले भारतमा भएको प्रथम खोखो विश्वकप तथा नेपाल र भारतबिच भएको टेस्ट म्याचमा रजत पदक जितेका थिए। खोखो टिमसँगै जुनियरमा दुई र पारामा एक खेलाडी, १० कर्मचारी तथा एक राष्ट्रिय खेल संघ, एक प्रायोजक, दुई पत्रकार र एक स्थानीयलाई सम्मान गरिएको छ।
जुनियरको पुरुषमा बक्सिङका अर्पिल राना तथा महिलामा क्रिकेटकी पूजा महतो जनही ५० हजार रुपैयाँसहित पुरस्कृत भए। अर्पिलले थाइल्यान्डमा भएको एसियाली यू– २२ युथ बक्सिङ तथा श्रीलंकामा भएको एसियाली बक्सिङ यू– १९ मा कांस्य जितेका थिए। पूजाले विश्वकप एसियाली छनोटमा २७२ रन बनाउनुका साथै १० विकेट लिएकी थिइन्। सोही छनोटमा ‘प्लेयर अफ द सिरिज’ हुन सफल भएकी थिइन्।
पारातर्फ तेक्वान्दोकी पलेशा गोबर्धन ५० हजार नगदसहित सम्मानित भइन्। पलेशाले पेरिस पाराओलम्पिकमा ऐतिहासिक कांस्य पदक तथा मलेसियामा भएको १०औँ एसियाली पारा तेक्वान्दोमा कांस्य पदक जितेकी थिइन्।
उत्कृष्ट राष्ट्रिय खेल संघमा नेपाल क्रिकेट संघ (क्यान) एक लाख रुपैयाँसहित पुरस्कृत भयो। उत्कृष्ट प्रायोजकमा नेपालय इन्टरनेसनल प्रालि र उत्कृष्ट स्थानीय तहमा बागमती गाउँपालिका, मकवानपुरलाई पुरस्कृत गरियो। उत्कृष्ट खेलकुद पत्रकारको पुरुषमा खेलाडी डटकमका अञ्जन खड्का र महिलामा मेरो खेल डटकमकी लक्ष्मी शाक्य जनही २० हजारसहित सम्मानित भए।
कर्मचारीतर्फ सर्वोत्कृष्ट परिषद् सेवा पुरस्कारबाट परिषद्को सचिवालयका नायब वरिष्ठ प्रशासकीय अधिकृत फणीन्द्रप्रसाद पौडेल (प्रशासन) तथा दाङ जिल्ला खेलकुद विकास समितिका तेक्वान्दो प्रशिक्षक भीमलाल विक (प्रशिक्षण) पुरस्कृत भए। दुवैले जनही २५ हजार रुपैयाँ पुरस्कार पाए। उत्कृष्ट परिषद् सेवा पुरस्कारको प्रशासनमा संघसंस्था समन्वय शाखाकी नायब वरिष्ठ प्रशासकीय अधिकृत प्रभा कर्माचार्य र प्रशिक्षणमा ललितपुर जिल्ला खेलकुद विकास समितिका तेक्वान्दो प्रशिक्षक तुल्सीनन्द बज्राचार्य जनही १५ हजार रुपैयाँसहित सम्मानित भए।
परिषद् सेवा पुरस्कारको प्रशासनमा ललितपुर जिल्ला खेलकुद विकास समितिका प्रशासकीय अधिकृत बाबुकाजी श्रेष्ठ र प्रशिक्षणमा तालिम तथा प्रशिक्षण विभागकी नायब वरिष्ठ एथलेटिक्स प्रशिक्षक उषाकर्ण चौधरी सम्मानित भए। करार सेवा पुरस्कारको प्रशिक्षणमा काठमाडौं जिल्ला खेलकुद विकास समितिका सहायक कराँते प्रशिक्षकद्वय संघरत्न महर्जन र कुशल श्रेष्ठ तथा प्रशासनमा राष्ट्रिय टिम तयारीकी सहायक द्वितीय दीपिका केसी र प्रशासन विभागका कार्यालय सहयोगी दुर्गा थापा पुरस्कृत भए। परिषद् र करार सेवाका पुरस्कृतले जनही १० हजार रुपैयाँ प्राप्त गरे।
उनीहरूलाई राखेपका अध्यक्ष युवा तथा खेलकुदमन्त्री तेजुलाल चौधरी, उपाध्यक्ष ध्रुव आचार्य, सदस्यसचिव टंकलाल घिसिङलगायतले पुरस्कृत गरेका हुन्। यसअघि प्रधानमन्त्री केपी ओलीले कार्यक्रमको उद्घाटन गर्ने तालिका थियो। तर, प्रधानमन्त्री ओली कार्यक्रममै नआउँदा कार्यक्रम एक घण्टा ढिला सुरु भएको थियो।
