संखुवासभाबाट झापा जाँदै गरेको बस दुर्घटना हुँदा १४ जना घाइते

संखुवासभाबाट झापा जाँदै गरेको बस दुर्घटना हुँदा १४ जना घाइते भएका छन्। शनिबार बिहान संखुवासभाको धर्मदेवी नगरपालिका–९, मूलगाउँबाट झापाको दमकको लागि छुटेको बा २ ख ७२४४ नम्बरको बस लालीगुराँस नगरपालिका टुटेदेउरालीमा दुर्घटना भएको जिल्ला प्रहरी कार्यालय तेह्रथुमका डिएसपी लीलाराज लामिछानेले बताए । उनको अनुसार बसमा सवार १४ जना यात्रुहरू घाइते भएका हुन् । 

घाइते हुनेहरूमा धर्मदेवी–९ का सविन विष्ट, अश्विन भारती र हिरा भारती, धर्मदेवी–६ का मनकुमार कटुवाल, श्रीमान तामाङ, सुजन कटुवाल, प्रतिमा तामाङ र सोममाया थायुम, धर्मदेवी–५ का धनमाया चापागाईं, धर्मदेवी–७ का विष्णु कटुवाल, भवानी कार्की र रत्नमाया कटुवाल, धर्मदेवी–१ का दलबहादुर कार्की र धनकुटा महालक्ष्मी नगरपालिका–१ का बिमल विश्वकर्मा घाइते भएका छन्। 

घाइतेलाई तेह्रथुमको वसन्तपुर अस्पतालमा उपचार भइरहेको छ भने गम्भीर अवस्था देखिएका सविन विष्ट र अश्विन भारती, रत्नमाया कटुवाल र दलबहादुर कार्कीलाई थप उपचरका लागि धरानस्थित बिपी कोइराला स्वास्थ्य विज्ञान प्रतिष्ठान घोपा क्याम्प पठाएको डिएसपी लामिछानेले बताए। बस दुर्घटनालगत्तै चालक संखुवासभा धर्मदेवी–६ का खेम महत फरार रहेको प्रहरीले जनाएको छ।