- वि.सं २o८२ श्रावण १५ बिहीबार
जुम्लाको पातारासी गाउँपालिका– ३ स्थित लौडचौरमा रहेको कर्णाली हाई अल्टिच्युट टे«निङ रंगशालामा गत आर्थिक वर्ष ०८१/८२ मा विनियोजन भएको पाँच करोड ६६ लाख ५० हजार रुपैयाँ फ्रिज भएको छ । बजेट फ्रिज हुँदा हाई अल्टिच्युट रंगशालाको निर्माण कार्य अन्योलमा परेको छ । रंगशाला निर्माणका लागि सहरी विकास तथा भवन निर्माण आयोजना जुम्लाले दुई करोड २९ लाख ५० हजार र राष्ट्रिय खेलकुद परिषद्ले चार करोड बजेट विनियोजन गरेका थिए ।
परिषद्ले निकासा गरेको रकममध्ये ६३ लाख रुपैयाँको मात्र काम भएको छ । राखेपले निकासा गरेको तीन करोड ३७ लाख रुपैयाँको काम नहुँदा बजेट फ्रिज भएको हो । जग्गा विवादका कारण काम नै हुन नसक्दा गत आर्थिक वर्षमा आएको बजेट फिर्ता भएको आयोजना जुम्लाका सूचना अधिकारी चन्द्रबहादुर खड्काले जानकारी दिएका छन् ।
‘जग्गा विवादकै कारण गत आर्थिक वर्षमा आएको बजेट फिर्ता भएको छ,’ उनले भने, ‘निकासा भएको रकमअनुसार काम नै भएन ।’ मालिका माध्यमिक विद्यालयको मैदान र स्थानीयका जग्गामा सात वर्षअघि बहुउद्देश्यीय हाई अल्टिच्युट रंगशालाको निर्माण कार्य सुरु भएको थियो । तर, जग्गासम्बन्धी विवाद कायमै रहेको खड्काले बताए । जग्गा विवादले सात वर्षसम्म पनि रंगशालाले पूर्णता पाउन नसकेको खड्काले बताए ।
‘रंगशाला निर्माण थालिएको सात वर्षसम्म पनि पूरा भएको छैन,’ उनले भने, ‘जग्गा अधिकरण नभएकाले ठेक्का नै नलागेर बजेट फ्रिज हुन गएको हो ।’ पातारासी– ३ का वडाध्यक्ष गोविन्द रावतले लोडचौरको स्कुल र स्थानीयको गरी ५० हजार वर्गमिटर जमिन रहेको बताए । ‘स्थानीयवासी नि:शुल्क जग्गा दिन तयार छन् । कित्ताकाट गर्न आवश्यक कागजात तयारी भएको छ,’ रावतले भने, ‘यही क्षेत्रमा रंगशाला निर्माण गर्न तीन करोडजति खर्च भइसकेको छ ।’ वडाध्यक्ष रावतले जनप्रतिनिधिबिच नै कुरा नमिल्दा निर्माण कार्य अन्योलमा परेको बताए । ‘स्थानीय र जनप्रतिनिधिबिच समन्वय हुन नसक्दा रंगशाला बन्न सकेको छैन । कर्णाली प्रदेशमा अन्तर्राष्ट्रियस्तरको हाई अल्टिच्युट रंगशाला बनाउन स्थानीय नि:शुल्क जग्गा दिन तयार छन्, तर जनप्रतिनिधिबिच वार्ता मिलेको छैन,’ रावतले भने, ‘दुवै पक्ष गम्भीर भएर वार्तामा बस्नुपर्छ ।’
यसैगरी, जिल्ला खेलकुद विकास समिति जुम्लाका प्रमुख कविदत्त न्यौपानेले सात वर्षअघि समितिकै पहलमा हाई अल्टिच्युट रंगशालाको निर्माण थालिएको बताए ।
