- वि.सं २o८२ असार १३ शुक्रबार
पूर्वी पहाडी तथा हिमाली जिल्ला संखुवासभामा मनसुन चाँडै भित्रिएसँगै धान रोपाइँ सुरु भएको छ । जिल्लाको भूगोलअनुसार उपल्लो तह हिमाली क्षेत्र र पहाडी क्षेत्रमा धमाधम रोपाइँ सुरु भएको छ ।
त्यस्तै, तल्लो औल क्षेत्रमा साउन लागेपछि मात्रै रोपाइँ सुरु हुने कृषि ज्ञान केन्द्र संखुवासभाका कार्यालय प्रमुख छत्रबहादुर विकले बताए । असार पहिलो सातासम्म भर्खरै रोपाइँ सुरु भएकाले ३ प्रतिशत मात्रै रोपाइँ भएको छ । जिल्लाको माथिल्लो तथा उपल्लो लेक क्षेत्रमा छिटो रोपाइँ गर्ने गरिन्छ ।
कृषि ज्ञान केन्द्र संखुवासभाको तथ्यांकअनुसार जिल्लामा ३१ हजार पाँच सय ९६ हेक्टर क्षेत्रफलमा धानखेती हुने गरेको छ । हरेक साताको शुक्रबार साताभरको रोपाइँको तथ्यांक अपडेट गर्ने गरेको कार्यालय प्रमुख विकको भनाइ छ ।
जिल्लाको खाँदबारी नगरपालिकाभित्रका सेकाहा, पाङ्मा, हेलुवाबेँसी, चन्दनपुर, चेवा, कलचेबेँसी, पाङ्ठाबेँसी, पिप्लेबेँसी, माल्टाबेँसीलगायतका ठाउँमा धानखेती गरिँदै आएको छ । १० वटा स्थानीय तह रहेको संखुवासभामा हेदांगना, चैनपुर, मादी र धुपुलगायतका स्थानमा धान उत्पादन हुने मुख्य क्षेत्र हुन् । विशेषत: यो जिल्लामा अट्टे, बेलगुठी, खुमलचार, राधाकृष्ण, सानोमसिना र कालधानलगायत जातका धान उत्पादन गर्ने गर्छन् । पूर्वमा नै धान उत्पादनमा संखुवासभालाई राम्रो जिल्लाका रूपमा गनिँदै आएको छ ।
