आजदेखि युवा संघको दसाैँ राष्ट्रिय महाधिवेशन

एमालेको भ्रातृ संगठन युवा संघ नेपालको दसाैँ राष्ट्रिय महाधिवेशन शुक्रबारदेखि पोखरामा सुरु हुँदै छ । आइतबारसम्म चल्ने महाधिवेशनको उद्घाटन गर्न एमाले अध्यक्षसमेत रहेका प्रधानमन्त्री केपी ओली आउने तय भएको छ । 

पोखराको अमरसिंह चौरमा हुने उद्घाटन सत्रमा महासचिव शंकर पोखरेल, उपमहासचिवसमेत रहेका सञ्चार तथा सूचना प्रविधिमन्त्री पृथ्वीसुब्बा गुरुङ, जनसंगठन समन्वय संयन्त्र प्रमुखसमेत रहेका एमाले स्थायी कमिटी सदस्य भानुभक्त ढकाललगायत नेताको सहभागिता रहने संघ कास्कीका सचिव हिमाल गुरुङले जानकारी दिए । तीन दिन चल्ने महाधिवेशनमा सहभागी हुन देशभरबाट दुई हजार प्रतिनिधि पोखरामा जम्मा हुँदै छन् । अधिवेशनले अध्यक्ष, उपाध्यक्ष दुई, महासचिव, उपमहासचिव, सचिव चारजना, नौजना पदाधिकारीसँगै १५१ सदस्यीय नयाँ कमिटी चयन गर्नेछ । संघका अध्यक्ष क्षितिज थेबेका अनुसार महाधिवेशन कार्यनीति र कार्यभार निर्माण गर्ने थलोका रूपमा स्थापित हुनेछ ।

संघको नेतृत्वका लागि पाँचजनाले दाबी गरेका छन् । पाँचजनाले दाबी गरे पनि पार्टी अध्यक्ष ओलीले सर्वसम्मत नेतृत्व चयन गर्न निर्देशन दिएको स्रोतको भनाइ छ । हालका अध्यक्ष थेबेसँगै उपाध्यक्षहरू प्रकाश गौतम, कृष्णहरि केसी, महाराज गुरुङ र महासचिव सुमन पुरीले अध्यक्षमा दाबी गरेका छन् । अध्यक्षसँगै अन्य पदाधिकारी र सदस्यमा आकांक्षा राख्ने धेरै छन्, तर पार्टी नेतृत्वले नै सर्वसम्मत गर्न भनेपछि आफूले चाहेको पदमा उम्मेदवारी दिन नपाउने भएपछि आकांक्षीहरू निराश बन्न पुगेका छन् ।