Skip This
काठमाडौं उपत्यका खानेपानी लिमिटेड (केयुकेएल)का प्रमुख कार्यकारी अधिकृत अशोककुमार पौडेलको राजीनामा माग गर्दै कर्मचारीले आन्दोलन सुरु गरेका छन्।
पौडेललाई पदमुक्त गराउनुपर्ने मागसहित बिहीबारदेखि आन्दोलन थालिएको केयुकेएल कर्मचारी संगठनका उपाध्यक्ष ओम ढकालले बताए। ‘नियुक्ति भएर आएदेखि कुनै काम गर्न सक्नुभएन। १४ महिनादेखि संस्थामा डिस्टर्ब मात्र गर्नुभयो। त्यसैले एक हप्ताभित्र राजीनामा दिनुभएन भने पानी वितरण नै बन्द गर्ने चरणमा पुग्छौँ,’ उनले भने।
केयुकेएलमा क्रियाशील पाँचैँ कर्मचारी संगठनका अनुसार प्रमुख कार्यकारी अधिकृत पौडेल पदमुक्त हुनुपर्ने कारण कम्पनीको संस्थागत हकहित तथा कर्मचारीको वृत्तिविकाससम्बन्धी ४ जेठ ०८१ मा व्यवस्थापन पक्ष र आधिकारिक टेड युनियनबिच भएको ३२ बुँदे सहमति कार्यान्वयन गराउनु रहेको छ। यस्तै, कम्पनीको संस्थागत, नीतिगत तथा संरचनागत सुधार गराउन वा अधिकार सम्पन्न एकल संरचना निर्माण गराउन, उपभोक्ता वर्गमा छिटोछरितो, सर्वसुलभ तथा प्रभावकारी र गुणस्तरीय सेवा प्रभाव गराउन, कम्पनीको क्षमता विकास गरी व्यावसायिक कम्पनीका रूपमा सञ्चालन गराउन पौडेललाई पदमुक्त गराउनुपर्ने संयुक्त विज्ञप्तिमा उल्लेख छ।
संस्थागत करारबाट तह १ देखि ३ को जनशक्ति लिने नीति खारेज गराई कम्पनीको दक्ष जनशक्ति व्यवस्थापन गराउन, मेलम्ची खानेपानी व्यवस्थापनका लागि गरेको लगानीको प्रतिफल सुनिश्चित गराउन, आयोजना कार्यान्वयन निर्देशनालयबाट उपभोक्ताको घरमा जडान हुने नयाँ धारा तथा मिटर जडानमा सहजीकरण गराउन, मिटर जडान तथा रिडिङ कार्यलाई प्रभावकारी बनाई महसुल संकलन वृद्धि गराउन भन्दै नौबुँदे कारणसहित आन्दोलन थालिएको ढकालले बताए।
