- वि.सं Invalid date format
बाँकेको दुर्गम क्षेत्र मानिने राप्ती नदीपारि अवस्थित नरैनापुर गाउँपालिका हुलाकी सडक सञ्चालनमा आएपछि सुगम बन्दै गएको छ ।
हुलाकी सडक निर्माणसँगै अहिले नरैनापुरबाट करिब आधा घण्टामै सदरमुकाम नेपालगन्ज पुग्न सकिने नरैनापुर गाउँपालिका–४ निवासी ताजमोहम्मद खानले बताए। ‘हुलाकी सडक निर्माण नहुँदा भारतको बाटो हुँदै नेपालगन्ज पुग्नुपर्थ्याे, अहिले आधा घण्टामै पुगिन्छ,’ खानले भने, ‘हुलाकी सडक नरैनापुरवासीको लाइफलाइन बनेको छ।’
हुलाकी सडक निर्माण भएपछि अहिले नेपालगन्जबाट नरैनापुरको सीमावर्ती क्षेत्र सुइया बघौडासम्म दैनिक रूपमा चारवटासम्म सार्वजनिक यात्रुबाहक बस सञ्चालन हुने गरेका छन्। हुलाकी सडक निर्माणपछि नरैनापुरवासीको स्वास्थ्य र शिक्षामा सहज पहुँच पुगेको नरैनापुर–६ का अगुवा सोहनलाल यादवको भनाइ छ।
‘पहिला बिरामीलाई अस्पताल पुर्याउन धेरै कठिन हुने गर्थ्यो, अहिले गाउँघरमै एम्बुलेन्स पुग्ने भएकाले बिरामीलाई सजिलै नेपालगन्जका अस्पतालमा लैजान सकिन्छ,’ यादवले भने, ‘नरैनापुरमा अहिलेसम्म उच्च शिक्षा अध्ययनका लागि क्याम्पस छैनन्, हुलाकी सडक बनेपछि विद्यार्थीलाई नेपालगन्ज पढ्न जानआउन धेरै सजिलो भएको छ।’ विगतमा सडक नहुँदा भारतीय बजारमा निर्भर रहेको नरैनापुरलाई हुलाकी सडकले सदरमुकाम नेपालगन्जसँग सीधा सम्पर्क गराएको यादवले बताए। हुलाकी सडकदेखि भित्री गाउँसम्म पुग्ने सडक निर्माणमा अब गाउँपालिकाले ध्यान दिनुपर्ने उनको भनाइ छ।
नरैनापुर गाउँपालिकाका अध्यक्ष इस्तियाक अहमद शाहले हुलाकी सडक निर्माण भएसँगै नरैनापुरवासीको जीवनयापनमा आमूल परिवर्तन आएको बताए। उनले गाउँपालिकाका ६वटै वडाका गाउँबस्तीसम्म पुग्ने सडक निर्माणलाई आफूले प्राथमिकता दिएको उल्लेख गरे। बहुप्रतीक्षित नेपालगन्ज–बघौडा सडक निर्माण चर्चा सुरु भएको दुईदशक बढी समयपछि निर्माण सम्पन्न भएको हो।
करिब २३ वर्ष अघिदेखि सडक निर्माण सुरु भए पनि पटक–पटकको अवरोध र अनिश्चितताका बिच नरैनापुर गाउँपालिकालाई सदरमुकाम नेपालगन्जसँग जोड्ने ४४ किलोमिटर सडक निर्माण सम्पन्न भएपछि आवागमनमा सहज भएको बाँके क्षेत्र नं १ का संघीय सांसद सूर्य ढकालले बताए। हुलाकी सडक निर्माण समयमै सम्पन्न गर्न आफूले आवश्यक समन्वय र चासो देखाएको बताउँदै उनले हुलाकी सडक निर्माणले यहाँका नागरिकलाई विकासको अनुभूति गराएको उल्लेख गरे।
