कोहलपुर–सुर्खेत १३२ केभी प्रसारण लाइनको काम तिहारसम्ममा सकिने 

कोहलपुर–सुर्खेत १३२ केभी प्रसारण लाइनको काम तिहारसम्म सक्ने गरी काम गर्न सरोकारवाला पक्ष सहमत भएका छन् । वन तथा वातारणमन्त्री ऐनबहादुर शाही, कर्णालीका मुख्यमन्त्री यामलाल कँडेल, बाँके राष्ट्रिय निकुञ्ज र कोहलपुर–सुर्खेत १३२ केभी प्रसारण लाइन प्रतिनिधिबिच भएको छलफलले तिहारसम्म काम सक्ने जनाएका हुन् । 

शनिबार बाँकेको चिसापानी गाभरमा भएको छलफलमा सरोकारवालासँगको छलफलमा कोहलपुर–सुर्खेत १३२ केभी प्रसारण लाइनको काम तिहारसम्म सक्ने गरी काम गर्न सहमत भएका हुन् । 

वन तथा वातावरणमन्त्री ऐनबहादुर शाहीले प्रसारण लाइनको काम छिटो सक्नका लागि निर्देशन दिए । ‘वन कटानको अनुमति पाई सकेको अवस्थामा के कति कारणले रोकिएको हो,’ उनले भने,‘त्यो चाडो सकाउनुपर्यो । कुनै प्रक्रिया नपुगेको हो भने सच्याउन आवश्यक रहेको छ ।’ 

वन तथा वातावरणमन्त्री शाहीले अधिकतम प्राथमिकतामा राखेर काम अघि बढाइए पनि केही ढिला हुन पुगेको बताए । ‘मन्त्रालयको तर्फबाट गर्नुपर्ने कामहरू हामी गर्छौं, गरिरहेका पनि छौं  बाँकी केही समस्या देखिएमा लेखेर पठाउनुस्, मन्त्रालयस्तर र मन्त्रिपरिषदबाट निर्णय गर्नुपर्ने भए गर्छौं,’ उनले भने ।

कर्णाली प्रदेशका मुख्यमन्त्री यामलाल कँडेलले निर्माणाधिन कोहलपुर–सुर्खेत १३२ केभी प्रशारणलाइनको बाँकी रहेका कामहरु छिटो सम्पन्न गर्न निर्देशन दिएका छन् । शनिबार प्रशारणलाइन अन्तर्गत सुर्खेतदेखि बाँकेको कोहलपुरसम्म बनेको विभिन्न संरचनाहरुको निरीक्षण गर्दै उनले जनस्तरमा देखिएका समस्या समाधान भइसकेकाले अब निर्माणमा ढिलाइ गर्न नहुने बताए । उनले आउँदो तिहारसम्म प्रशारणलाइनको फिल्डको काम सकेर सब स्टेशनमा विद्युत् जोड्ने गरी काम सम्पन्न गर्न आयोजना कार्यालयलाई निर्देशन दिए । 

मुख्यमन्त्री कँडेलले संस्थागत क्षमता बढाएर कामलाई छिटो छरितो सम्पन्न गर्न तर्फ ध्यान दिन आग्रह गरे । ‘अहिलेसम्म विभिन्न कानुनी र स्थानीयसंगको विवादलाई देखाएर ढिलाइ भयो, अब ती समस्याहरु समाधान भइसकेका छन्, उनले भने, मौसम प्रतिकुलतालाई देखाएर अब धेरै समय ढिला गर्ने छुट छैन्, जतिसक्दो छिटो प्रशारणलाइनको काम सम्पन्न गर्नुस, प्रदेश र संघीय सरकारबाट कुनै निर्णय, समन्वय एवं सहकार्य गर्नुपर्ने भए जानकारी गराउनुस् ।’  उनले निकुञ्जका कर्मचारीलाई कर्णालीबासीको दिनचर्यासंग जोडिएको राष्ट्रिय प्राथमिकताप्राप्त आयोजनामा देखिएको अवरोधलाई स्थानीयस्तरबाटै समाधान गर्न पहलकदमी लिन जोड दिए । 

बर्दिया राष्ट्रिय निकुञ्जका वार्डेन अशोक रामले काटिएका काठहरू ल्याउन बाँकी रहेकाले अब रुख कटान र ढुवानीमा ढिलाइ नगर्ने प्रतिबद्धता जनाए । 

आयोजना प्रमुख रवि चौधरीका अनुसार १६२ वटा टावरमध्ये तीन वटामात्र निर्माण बाँकी रहेको र १० किमि लाइन तान्न बाँकी रहेको जानकारी दिए । बाँके बानियाँभारमा खेतको पानीले गर्दा टावरको जग खन्न ढिलाइ भएको र पानी कम हुनेबित्तिकै यसलाई पूरा गरिने उनको भनाइ छ।

यसअघि बाँकेको बानियाँभार, गाभर र सुर्खेतको सुब्बाकुनामा मुआब्जा विवाद थियो । सरकारले राष्ट्रिय प्राथमिकताप्राप्त आयोजनाको हकमा मुआब्जा नीतिमा फेरबदल गरेपछि यो विवाद हल भएको हो । साथै, आयोजनाले भौगोलिक जटिलताले रुख काट्न र ढुवानी गर्न समस्या हुने केही स्थानमा ड्रोनको सहायताबाट लाइन जोड्ने तयारी गरेको छ। बाँकेको कोहलपुरबाट सुरु भएर सुर्खेतको वीरेन्द्रनगर ११, स्थित सुब्बाकुना सबस्टेसन पुगेर टुंगिने प्रसारण लाइनको दूरी ५२ किलोमिटर छ ।