बार एसोसिएसन बागलुङको अध्यक्षमा गीता श्रीस 

उच्च अदालत बार एसोसिएसन बागलुङको अध्यक्षमा अधिवक्ता गीता श्रीस काउचा थापा सर्वसम्मत निर्वाचित भएकी छिन्। शुक्रबारदेखि सुरु भएको बारको ३३औँ अधिवेशनबाट श्रीस अध्यक्षमा चयन भएकी हुन्। यसअघि बारको सदस्यको रूपमा रहेकी थिइन्। उनी जिल्लामा बारको पहिलो महिला अध्यक्षको रूपमा समेत रहेकी छिन्। 

अध्यक्षमा लागि अधिवक्ता हरिकृष्ण सुवेदीले पनि उम्मेदवारी दर्ता गरेमा थिए। अन्तिम समयमा सुवेदीले आफ्नो उम्मेदवारी फिर्ता लिएपछि श्रीस निर्विरोध निर्वाचित भएको निर्वाचन समितिले जनाएको छ। 

वरिष्ठ अधिवक्ता काजी गाउँले श्रेष्ठ, अधिवक्ता डा. डिल्लीराज गौतम र अधिवक्ता ज्ञानेन्द्रराज पन्त रहेको निर्वाचन समितिले शनिबार उम्मेदवारको अन्तिम नामावली प्रकाशन गर्दा सुवेदीले आफ्नो उम्मेदवार फिर्ता लिएपछि श्रीस निर्विरोध निर्वाचित भएको जनाइएको छ। 

बारको उपाध्यक्षमा लक्ष्मी बास्कोटा, सचिवमा उमाशंकर सापकोटा र कोषाध्यक्षमा रामराजा कँडेल चयन भएका छन्। सदस्यहरूमा नरेन्द्रप्रतापसिंह बुढाथोकी, तेजेन्द्र थापा, प्रकाश बराल र लक्ष्मीदेवी जिसी चयन हुँदा मानव अधिकार समितिको सदस्यमा गोविन्दप्रसाद ओझा चयन भएको निर्वाचत समितिका संयोजक काजीगाउँले श्रेष्ठले जानकारी दिए। 

बारको केन्द्रीय पार्सदतर्फ बद्रीप्रसाद शर्मा, हरि गौतम, गोविन्द गौतम, अखिलनाथ शर्मा चयन भएका छन् । बारमा तीन सदस्य र महिला समिति संयोजक रिक्त छ । सहसचिव पदमा पुग्ने नै महिला समितिको संयोजक रहने वैधानिक व्यवस्था छ । उनी डिएलए गण्डकी प्रदेशको सदस्यसमेत रहेकी छिन्।