अछाममा छाउ बार्न त्रिपालमुनि सुतेकी महिला र बालिकाको मृत्यु

अछामको बारलामा छाउ बार्न त्रिपालमुनि सुतेकी एक महिला र अर्की एक बालिकाको भिरबाट खसेको ढुंगा लागेर मृत्यु भएको छ । घटनामा एक महिला गम्भीर घाइते छिन् ।

मृत्यु हुनेमा पञ्चदेवल विनायक नगरपालिका– ८ बारलास्थित सेलापानी चुरखोला टोलकी ३५ वर्षीया निमदेवी खनाल र सात वर्षीया बालिका कविता भण्डारी रहेका छन् । भण्डारी मंगलसेन नगरपालिका– ६ की हुन् ।

घटनामा मृतक कविताकी आमा ३६ वर्षीया रत्नकला भण्डारी घाइते भएकी छिन् । जिल्ला प्रहरी कार्यालय अछामका प्रमुख प्रहरी नायब उपरीक्षक ओमप्रकाश खनालका अनुसार निमदेवी र रत्नकला छाउ (महिनावारी) भएका कारण घरनजिकै त्रिपाल टाँगेर बसेका थिए ।

उनीहरूसँगै बालिका पनि सुत्न गएकी हुन् । राति सुतिरहेको वेला निरन्तरको अविरल वर्षाका कारण घरमाथिको भिरबाट खसेको ढुंगा लागेर उनीहरू दुईजनाको मृत्यु भएको डिएसपी खनालले बताए । घटनामा घाइते रत्नाको अवस्था पनि गम्भीर रहेको छ । रत्ना केही समयदेखि माइतीमा बस्दै आएकी थिइन् ।