जनतासँग माओवादी जागरण अभियान किस्ताबन्दीमा, दोस्रो चरणको अभियान २२ भदौबाट 

प्रमुख प्रतिपक्षी दल माओवादीले जनतासँग माओवादी जागरण अभियानलाई किस्ताबन्दीमा अगाडि बढाएको छ । २ जेठमा बैतडीबाट सुरु भएको अभियान जेठभित्रै सक्ने तयारी गरे पनि सम्भव भएन । यसपछि पटकपटक अभियान स्थगित हुँदै आएको छ । मध्यपहाडी लोकमार्गकेन्द्रित अभियान अब पुन: २२ भदौबाट सुरु हुने भएको हो । 

‘जनतासँग माओवादी : मध्यपहाडी पुष्पलाल लोकमार्ग जनजागरण अभियान’ गत २ जेठमा बैतडीबाट माओवादी अध्यक्ष पुष्पकमल दाहाल ‘प्रचण्ड’ले सुरु गरेका थिए । 

दोस्रो चरणको अभियान १० जेठमा पोखरा पुगेर रोकिएको थियो । मध्यपहाडी अभियान दुई चरणमा सम्पन्न गर्ने माओवादीको योजना थियो । यसपछि दोस्रो चरणको अभियान २१ देखि २५ जेठमा गर्ने तयारी थियो । तर, वर्षाका कारण उक्त समयमा अभियान नभएको माओवादीले जनाएको छ । दुवै चरणको अभियान जेठभित्रै सक्ने तयारी थियो ।

रोकिएको मध्यपहाडी लोकमार्गकेन्द्रित अभियान लमजुङबाट सुरु गरेर ताप्लेजुङमा समापन गर्ने तयारी छ । ‘वर्षाका कारण रोकिएको अभियान २२ भदौबाट पुन: सुरु हुँदै छ । दसैँअघि अभियान सकेर दसैँ–तिहारको बिचमा केन्द्रीय समिति बैठक बस्ने माओवादीको तयारी छ ।

अभियानका क्रममा जनसभा, संवाद, भेटघाटलगायतका कार्यक्रम हुनेछन् । अभियानमा पर्ने सबै जिल्लामा एक–एक सार्वजनिक संवादको कार्यक्रम र एक–एक आन्तरिक संगठनात्मक र प्रशिक्षणमूलक कार्यक्रम हुनेछन् । सार्वजनिक कार्यक्रम आयोजना गर्दा मौसमलाई ध्यानमा राखेर ठुला हलहरूको प्रबन्ध गर्न भनिएको छ । त्यस्ता कार्यक्रममा सर्वपक्षीय प्रतिनिधिमूलक सहभागितालाई जोड दिन सम्बन्धित कमिटीलाई निर्देश गरिएको छ । यसअघि माओवादीले मध्यपहाडी अभियान जेठभित्र सक्ने तयारी गरेको थियो । तर, बजेट र वर्षाको कारण देखाउँदै पोखरा पुगेर अभियान रोकिएको थियो ।

तराई मधेश जागरण अभियान सफल भएको निष्कर्षसहित माओवादीले दोस्रो चरणमा मध्यपहाडी लोकमार्गकेन्द्रित अभियान सुरु गरेको थियो । दुई अभियानले जनतामा पार्टीलाई जोड्न महत्ववपूर्ण भूमिका खेलेको ठहर माओवादीको छ ।

अभियानको नेतृत्व पार्टी अध्यक्षबाटै
अभियानको नेतृत्व माओवादी अध्यक्ष पुष्पकमल दाहाल ‘प्रचण्ड’ले गरेका छन् । अभियानमा वरिष्ठ उपाध्यक्ष नारायणकाजी श्रेष्ठसहित उपाध्यक्षहरू, महासचिव, उपमहासचिवसहित शीर्ष नेताहरू खटिँदै आएका थिए । अब भने प्रचण्डको नेतृत्वमा वरिष्ठ उपाध्यक्ष, उपाध्यक्षहरू र महासचिव मात्रै शीर्ष तहमा रहने भएका छन् । 
गत जेठमा माओवादीले काठमाडौंकेन्द्रित अभियानसमेत सम्पन्न गरेको छ । गत १६–१९ साउनमा बसेको माओवादी स्थायी समिति बैठकले अभियानका बाँकी कार्यक्रम अघि बढाउने निर्णय गरेको थियो । सोही निर्णयअनुसार २१–२५ भदौको कार्यतालिका निर्धारण भएको छ । अभियानमा सहभागी हुन माओवादी शीर्ष नेताहरू २१ भदौमा लमजुङ पुग्नेछन् । २२ भदौमा लमजुङमा कार्यक्रम गरेर बेलुका गोरखा पुग्ने कार्यक्रम छ । २३ भदौमा गोरखामा कार्यक्रम सकेर धादिङ पुग्ने, २४ भदौमा धादिङमा कार्यक्रम सकेर नुवाकोट पुग्ने कार्यक्रम छ । २५ भदौमा नुवाकोटमा कार्यक्रम सकेर काठमाडौं फर्किने तयारी छ । बाँकी जिल्लाको कार्यक्रम छिट्टै तय गरिने माओवादी केन्द्रीय कार्यालयका मुख्यसचिव गणेशमान पुनले जानकारी दिए । ‘हाल काठमाडौंसम्मको कार्यक्रम तय भएको छ । असोज पहिलो हप्ताभित्र अभियान सकिने गरी बाँकी कार्यतालिका आउँछ,’ उनले भने ।

यसअघि १२ फागुनदेखि १७ वैशाखसम्म माओवादीले हुलाकी राजमार्गकेन्द्रित अभियान सञ्चालन गरेको थियो । उक्त अभियान पनि दुई चरणमा सम्पन्न भएको थियो । झापाबाट सुरु भएको अभियान महोत्तरी पुगेर रोकिएको थियो । त्यसपछि १२ चैतमा अभियान समापन गर्ने निर्णय थियो । तर, अभियान समापन गर्न १७ वैैशाख लाग्यो । उक्त अभियान सोचेभन्दा बढी उपलब्धिमूलक भएको माओवादी निष्कर्ष छ ।