- वि.सं २o८२ श्रावण १९ सोमबार
नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङले प्राधिकरणको अहिलेको नेतृत्वले व्यवस्थापन गर्न नसक्दा विद्युत् आपूर्तिमा समस्या देखिएको बताएका छन्।
‘उज्यालो नेपाल अभियानका’साथ अमेरिकाको भ्रमणमा रहेका घिसिङले अस्टिनमा रहेका नेपाली समुदायले गरेको कार्यक्रममा विद्युत् उत्पादन पर्याप्त रहे पनि प्राधिकरण नेतृत्वले व्यवस्थापकीय क्षमता देखाउन नसक्दा देशभर विद्युत् आपूर्तिमा समस्या भएको टिप्पणी गरे।
घिसिङले भने, ‘नयाँ व्यवस्थापन आएपछि विगतमा सुरु गरिएको सही व्यक्तिलाई सही ठाउँमा लत्याएर राम्रो काम गरिरहेकालाई कुलमानका मान्छे भन्दै जिम्मेवारीबाट हटाउन सुरु गरियो, देशभरिका विद्युत प्रणाली सञ्चालन गर्ने भार प्रेषणजस्तो संवेदनशील ठाउँको प्रमुखलाई हटाइयो। अहिले चल्दै नचल्ने अवस्था आएपछि पुनः उही व्यक्तिलाई लैजानुपर्ने अवस्था आयो, त्यसैले नेपालमा अहिले देखिएको विद्युत् आपूर्तिको समस्या स्रोत नभएर होइन, व्यवस्थापन गर्न नसकेर हो, व्यवस्थापनको पूर्ण असफलता हो।’
एसियाली विकास बैंकको सहायतामा निर्माण गर्न लागिएको ६७० मेगावाटको दुधकोशी जलाशययुक्त आयोजनाको लगानी जुटाउनुपूर्वका कामहरू अन्तिम चरणमा पुगिरहेको अवस्थामा अहोरात्र खटिरहेका कम्पनीका प्रमुख कार्यकारी अधिकृतलाई हटाएर प्राधिकरण व्यवस्थापनले आयोजनालाई अन्याेलमा पार्ने काम गरेको घिसिङको भनाइ थियो।
उनले घाटमा रहेको संस्थालाई नाफामा लगेको, करिब सबैको घरमा बिजुली पुर्याएको, विगतमा लोडसेडिङको समयमा डेडिकेटेड तथा ट्रंकलाइनबाट विद्युत् लिएका औद्योगिक ग्राहकको प्रिमियम महसुल बक्यौता उठाउन प्रयास गरिरहेको अवस्थामा सरकारले अपमानपूर्वक आफूलाई हटाएको उल्लेख गरे।
लोडसेडिङ अन्त्य कुनै जादु नभएर प्राधिकरणको कार्यकारी निर्देशकको दायित्व इमानदारपूर्वक निर्वाह गर्दा मुलुकबाट लोडसेडिङ अन्त्य भएको उल्लेख गर्दै घिसिङले यसमा तत्कालीन प्रधानमन्त्री, ऊर्जामन्त्री, प्राधिकरणका कर्मचारी आमउपभोक्ता, विदेशमा रहेका नेपालीको साथ र हौसलाले गर्दा थप काम गर्न प्रेरित गरेको बताए।
