- वि.सं २o८२ असार २३ सोमबार
पूर्व-पश्चिम राजमार्गअन्तर्गत कपिलवस्तुको गोरुसिंगे जंगलमा एम्बुलेन्स र विंगर एकापसमा ठोक्किँदा एकजनाको मृत्यु भएको छ भने १२ जना घाइते भएका छन्।
आज सोमबार अपराह्न ४ बजे भएको उक्त दुर्घटनामा अर्घाखाँचीको भूमिकास्थान नगरपालिकाकी ९५ वर्षीया ईन्द्रकला रानाको उपचारको क्रममा मृत्यु भएको इलाका प्रहरी कार्यालय पिपराले जनाएको छ। अर्घाखाँचीबाट बुटवल जाँदै गरेको एम्बुलेन्स र बुटवलदेखि चन्द्रौटातर्फ जाँदै गरेको लु १ ज ४२८० नम्बरको विंगर एकापसमा ठोक्किएको प्रहरीले जनाएको छ।
घाइतेहरूमध्ये एकजनाको अवस्था गम्भीर रहेको र थप उपचारका लागि बुटवल रिफर गरिएको छ। अन्य घाइतेहरूको कपिलवस्तु वाणगंगास्थित सामुदायिक अस्पताल, युनाइटेड हस्पिटल र सी एन्ड सी हस्पिटल चार नम्बरमा उपचार भइरहेको प्रहरीले बताएको छ।
