जिल्ला अदालत गुल्मीले रेसुंगा नगरपालिका–३ भाडगाउँकी २१ वर्षीया सम्झना बोहरालाई हत्या गरेर बोरामा फाल्ने ४७ वर्षीय लालबहादुर खत्रीलाई जन्मकैदको फैसला सुनाएको छ । न्यायाधीश राधाकृष्ण उप्रेतीले जिल्ला सरकारी वकिल कार्यालयको अभियोग मागदाबीबमोजिम जन्मकैद फैसला गरेको अदालतका फैसला कार्यान्वयन अधिकृत रामबहादुर कुँवरले जानकारी दिए ।
सम्झना २९ माघ ०७७ देखि परिवारको सम्पर्कमा थिइनन् । उनी हराएको दुई दिनपछि सासू टोमकला खत्रीले आत्महत्या गरिन् । परिवारले बेपत्ता बुहारीको खोजी र बुहारी र माइतीले मानसिक तनाव दिएर टोमकलाले आत्महत्या गरेको भन्दै प्रहरीमा दुरुत्साहनको मुद्दासमेत दर्ता गरे ।
प्रहरी प्रशासन घेराउ र नाराबाजी भए । प्रहरी प्रमुखको सरुवा भयो । आन्दोलनको नेतृत्व अभियुक्त खत्रीले नै गरेका थिए । बेपत्ता भएको १९ दिनपछि बोहराको शव घरनजिकको झाडीमा फेला पर्यो ।
