दैलेखको नौमूले गाउँपालिकाका जनतालाई वितरण गर्ने भन्दै पालिकाले खरिद गरेको चामल दुई वर्ष गोदाममै थन्कियो । दुई वर्षअघि असिनापीडित जनताका लागि भनेर गाउँपालिकाले खाद्य डिपो दैलेखअन्तर्गत पालिकाको रकममा लाखौँको चामल खरिद गरेको थियो । ढुवानी भाडा पालिकाले व्यहोरेको र जनतालाई सस्तोमा चामल वितरण गर्ने अभियानअन्तर्गत लगिएको चामलमध्ये बचेको चामल कुहिएपछि स्थानीय प्रशासन र प्रहरीको रोहवरमा एक सय ५५ बोरा चामल गाडिएको छ ।
दुई वर्षदेखि गोदाममै थन्किएपछि एक सय ५५ बोरा चामल कामै नलाग्ने अवस्थामा पुगेको थियो । स्थानीयले खबरदारी गरेपछि गाउँपालिका, जिल्ला प्रशासन कार्यालय, जिल्ला प्रहरीको रोहवरमा चामल गाडिएको छ । तत्कालीन समयमा नौमूले गाउँपालिकामा असिना परेर मकै र धान बाली नष्ट भयो, स्थानीयहरू भोकमरीको चपेटामा पर्न सक्ने अवस्था आएपछि दुई वर्ष अघिदेखि पालिकाले जनता बचाउने अभियानअन्तर्गत सस्तो मूल्यमा चामल खरिद गरेर पालिकाका जनतालाई वितरण अभियान पनि थाल्यो । करिब पाँच ट्रकभन्दा बढी चामल नौमूले लगिएको थियो, पालिकानजिकै गोदाम बनाएर वडा–वडामा चामल वितरण गरिएको नौमूले गाउँपालिकाले जानकारी दिएको छ ।
गाउँपालिकाका निमित्त प्रमुख प्रशासकीय अधिकृत भूपेन्द्र शाहीले आफूले कार्यालय प्रमुखको जिम्मेवारी पाउनुभन्दा करिब दुई वर्षअघिको विषय भएको बताउँदै बिग्रेको चामललाई मुचुल्का उठाएर विसर्जन गरिएको बताए । उनले पालिकामा विभिन्नखाले समस्याहरू, कोभिड समस्या निरन्तर रहिरहेकोले अति आवश्यकता परेको वेलामा चाहिने होला भन्दै पालिकाले स्टक राखेको हो धेरै समय गोदाममै रहेपछि बिग्रेको बताएका छन् ।
गोदाममा चामल कुहिनु पालिकाको कमजोरी : स्थानीय
दुई वर्षसम्म जनतालाई चामल वितरण नगरेर राखिनुमा पालिकाको कमजोरी भएको स्थानीयको आरोप छ । जनताको करको रकमबाट आएको पैसा हो । गरिब र निमुखा जनतालाई समयमै वितरण गर्नुपर्नेमा पालिकाकै कमजोरीका कारण जनताले चामल नपाएको र लाखौँको चामल कुहिएकोप्रति स्थानीय बासिन्दाहरूले आक्रोश पोखेका छन् । लापरबाही गर्ने जोकोहीलाई पनि कारबाही गर्नुपर्ने माग स्थानीय बासिन्दाले गरेका छन् । जनताका लागि भनेर ल्याएको भए किन बाँडिएन ? कसको आदेशमा चामल राखिएको हो ? यो विषयमा व्यक्तिगत स्वार्थ हाबी भएकोले यसको जिम्मेवारी अध्यक्ष र कार्यपालिका सदस्यहरूले लिनुपर्ने एक स्थानीयको भनाइ छ ।
मैले मेरो घरमा चामल राखेको हाेइन : अध्यक्ष भदे बुढामगर
‘जनताकै लागि हामीले हजारौँ बोरा चामल वितरण गर्याैँ, असिनापीडितदेखि कोरोना महामारीका वेला आइसोलेसन, क्वारेन्टाइनमा बसेका जनतालाई पालिकाले खरिद गरेको चामल प्रयोगमा ल्याएका हौँ । पालिकामा समस्या धेरै भएपछि चामल ल्याउँदा, पल्टी गर्दा, एक स्थानबाट अर्को स्थानमा सार्दा भिजेका बोराहरू र गोदामको मुनि परेका बोराहरूमध्ये केही चामल बिग्रेको अवस्था आएको हो । हामीले नमस्ते होटेलको पछाडि गोदाममा राख्दा हजारौँ बोरामध्ये केही चामल बिग्रिन पुगेछ, मैले चामल घरमा लगेर राखेको भन्ने विषय गलत हो । व्यवस्थापनमा केही कमजोरी भएको होला, तर मैले व्यक्तिगत स्वार्थमा चामल प्रयोग गरेको छैन, जनताकै लागि ल्याएका हौँ, व्यक्तिगत कमजोरी देखाउने काम कहीँ कतैबाट भएकोमा मलाई दुःख लागेको छ।’ बुढाले भने ।
