निसान कम्पनीका गाडीको नेपालका लागि आधिकारिक वितरक पायोनियर मोटो कर्प प्रालिले नेपाली बजारमा विद्युतीय सवारीसाधन लिफ सार्वजनिक गर्दै बुकिङ खुला गरेको छ । कम्पनीले यो गाडीको मूल्य ५९ लाख ९९ हजार रुपैयाँ तोकेर बुकिङ सुरु गरेको हो ।
सुरक्षित र दिगो भविष्यको प्रत्याभूतिसहित नेपाली बजारमा लिफ इभी उपलब्ध गराएको कम्पनीले जनाएको छ । शून्य प्रदूषणको विशेषता भएको निसान लिफ इलेक्ट्रिक भेहिकल निसानको उत्कृष्ट, भरपर्दो र आकर्षक डिजाइनको नयाँ उत्पादन रहेको दाबी गरिएको छ । जापानबाट आयात हुने यो पहिलो विद्युतीय सवारीसाधन रहेको कम्पनीको भनाइ छ ।
निसान मोटर इन्डियाका अध्यक्ष सिनान ओजकोकले विद्युतीय सवारीसाधनको सेगमेन्टका लागि नयाँ अध्याय अंकित गर्दै निसानले नेपालमा दोस्रो जेनेरेसनको निसान लिफ सार्वजनिक गरेको बताए । निसानको ‘निसान इन्टेलिजेन्ट मोबिलिटी’अन्तर्गत ग्राहकले स्मार्ट, आरामदायी, वातावरणमैत्री र सुरक्षित अनुभवको लाभ लिन सक्ने उनको भनाइ छ ।
पायोनियर मोटो कर्प प्रालिका प्रबन्ध निर्देशक सन्दीपकुमार शारदाले इलेक्ट्रिक भेहिकलका विशेषताहरू र उपयोगिताबारे ग्राहकलाई जानकारी गराउनुका साथै अब विश्व र नेपालको भविष्य नै इलेक्ट्रिक भेहिकल रहेको बताए । उनले भने, ‘शून्य प्रदूषणसहितको उपयुक्त प्रविधिमा आधारित यो सवारीसाधन चालकदेखि यात्रुलाईसमेत सुविधासम्पन्न र आरामदायी छ । निसान लिफ इभीले आफ्ना ग्राहकहरूलाई सुरक्षित, स्मार्ट र सुविधासम्पन्न यात्रा गर्न थप सहजीकरण गर्नेछ ।’
यसमा ४० किलोवाट आवरको ब्याट्री जडान गरिएको र एकपल्ट चार्ज गर्दा ३ सय ११ किलोमिटरसम्म चलाउन सकिने कम्पनीले जनाएको छ । यसको अधिकतम गुड्ने क्षमता प्रतिघन्टा १ सय ४० किलोमिटर रहेको कम्पनीले जनाएको छ । यसलाई घरमा नै डेडिकेटेड वाल आउटलेटबाट १५ देखि १८ घन्टामा र निसानको चार्जिङ स्टेसनबाट ४० देखि ६० मिनेटमा फुल चार्ज गर्न सकिने कम्पनीको भनाइ छ । यो गाडीको ब्याट्रीमा कम्पनीले ८ वर्ष वा १ लाख ६० हजार किलोमिटर (जुन पहिला आउँछ)सम्मको वारेन्टी प्रदान गर्ने कम्पनीले जनाएको छ ।
