नेपाल नागरिक उड्डयन प्राधिकरणले ११ वटा वायुसेवा कम्पनीहरूलाई बक्यौता रकम बुझाउन ३० दिने म्याद दिएको छ । ११ कम्पनीहरूले वर्षौँदेखिको ५ करोड ४५ लाख १९ हजार ६ सय ५० रुपैयाँ बक्यौता बुझाउन प्राधिकरणले सार्वजनिक सूचना निकालेको हो ।
नेकोन एयर, शिवानी एयर, अल्पाइन एयर, गोरखा एयर, कर्णाली एयर, माउन्टेन एयर, कस्मिक एयर, सांग्रिला एयर, स्काइलाइन एयरवेज, एयर काष्ठमण्डप र नेपाल एयरवेजलाई शुल्क बुझाउन ३० दिने म्याद दिएको हो । यी एयरलाइन्सहरू हाल सञ्चालनमा छैनन् ।
३० दिनभित्र पनि रकम बुझाउन नआएमा सञ्चालक, एकाघरका परिवार र जमानी बस्नेहरूको जायजेथाबाट सरकारी बाँकीसरह असुलउपर गर्ने चेतावनी प्राधिकरणले दिएको छ ।
प्राधिकरणले जारी गरेको सार्वजनिक सूचनामा लेखिएको छ, ‘यो सूचना प्रकाशित भएको मितिले ३० दिनभित्रमा उक्त रकम र नियमानुसार लाग्ने विलम्ब शुल्कसमेत बुझाई आफ्नो हरहिसाब फरफारक गर्नुहुन तथा उल्लिखित बक्यौता रकम सम्बन्धमा कुनै फरक परेको आधार र प्रमाण भएमा पुस्ट्याइँसहित पेस गरी हिसाब मिलान गर्नुहोला ।’
प्राधिकरणका अनुसार सबैभन्दा धेरै बक्यौता रकम नेकोन एयरको छ । यो कम्पनीले ४ करोड ७० लाख ६० हजार ७ सय ५५ रुपैयाँ प्राधिकरणलाई बुझाउनुपर्नेछ । यसैगरी, कस्मिक एयरको बक्यौता रकम ३ करोड ४७ लाख ५८ हजार ७० रुपैयाँ छ ।
