नेपाली कांग्रेसका केन्द्रीय सदस्य डा. शेखर कोइरालाले प्रधानमन्त्री केपी ओलीले चालेको असंवैधानिक कदम नसच्चिएसम्म कांग्रेसले निरन्तर सडक संघर्ष गरिरहने बताएका छन् ।
आज सोमबार सरकारले चालेको असंवैधानिक कदमविरुद्ध मोरङ क्षेत्र नम्बर ६ ले विराटनगरमा आयोजना गरेको विरोध सभामा बोल्दै नेता कोइरालाले नेपाली कांग्रेस कदापि कम्युनिस्ट नेतृत्वको सरकारमा नजाने र निरन्तर सर्वसत्तावाद र अधिनायकवाद पराजित गर्न सडकमा आन्दोलन गरिरहने बताएका हुन् ।
विराटनगरको जनआन्दोलन चौकमा आयोजित विरोध सभालाई सम्बोधन गर्दै कोइरालाले भने, ‘प्रतिगमन नसच्चिएसम्म कांग्रेस एक दिन हाेइन निरन्तर सडकमा रहन्छ र सडकबाटै निर्णय गरिछाड्नेछ ।’,
भावी महाधिवेशनमा कांग्रेस सभापतिको उम्मेदवारका दाबेदार पनि रहेका नेता कोइरालाले सर्वसत्तावाद र अधिनायकवादको विरोधलाई गाउँगाउँसम्म पुऱ्याउन कार्यकर्ताहरूलाई निर्देशन दिए ।
तर, कोइरालाले सर्वाेच्च अदालतले केपी ओलीको असंवैधानिक कदमलाई सदर गर्दै निर्वाचन गराउन फैसला गरे पनि सुनिश्चिता नभएसम्म कांग्रेसले सडक नछाड्ने बताए ।
उनले अगामी सरकार नेपाली कांग्रेसको आफ्नै नेतृत्वमा हुने र त्यसका लागि गाउँगाउँबाट वातावरण तयार गर्न पनि कार्यकर्ताहरूलाई आग्रह गरे ।
केन्द्रीय सदस्य डा. डिला संग्रौलाले प्रधानमन्त्री ओली सर्वसत्तावाद र अधिनायकवादको पछि लागेको बताइन् ।
