भाउजूको हत्या अभियोगमा लमजुङ प्रहरीले एकजनालाई पक्राउ गरेको छ । घटनाको २३ दिनपछि क्व्होलासोंथर गाउँपालिका– ९ गिलुङकी ५९ वर्षीया बिमाया भन्ने बुद्धिमाया विकलाई हत्या गरेको आरोपमा देवर नाता पर्ने गिलुङका ५७ वर्षीय बिलबहादुर विकलाई पक्राउ गरेको लमजुङका प्रहरी प्रमुख डिएसपी गंगाबहादुर थापाले बताए ।
प्रहरी थापाका अनुसार बिलबहादुरसँगको सोधपुछमा भदौ २० गते राति करिब ९ बजे भाउजू (बुद्धिमाया) लाई टाउकोमा दाउरा प्रहार गरी हत्या गरेको स्वीकार गरेका थिए ।
बिलबहादुरलाई सोमबार जिल्ला अदालतबाट २० दिनको म्याद थप गरेर थप अनुसन्धान थालिएको इन्स्पेक्टर ओमप्रकाश पुनले जानकारी दिए । प्रहरीका अनुसार जग्गासम्बन्धी विवादमा एकल महिला बुद्धिमायालाई बिलबहादुरले हत्या गरेको प्रारम्भिक अनुसन्धानबाट खुलेको छ ।
गत भदौ २३ गते बिहान ७ बजे बुद्धिमाया आफ्नै घरमा मृत भेटिएकी थिइन् ।
