लगानी क्षेत्र अभावका कारण वृद्धि भइरहेको बजारमा गत साता २२ प्रतिशतले वृद्धि भएर ११ अर्ब ९० करोड २४ लाख रुपैयाँको सेयर किनबेच भएको छ । अघिल्लो साता ९ अर्ब ७४ करोड रुपैयाँको सेयर किनबेच भएको थियो ।
गत साता ५० अंक जोड्दै सेयर बजार १ हजार ५ सय १० अंकमा बन्द भएको छ । अर्थमन्त्रीका रूपमा डा. युवराज खतिवडाले निरन्तरता पाउने–नपाउने विषयलाई लगानीकर्ताले रणनीति बनाएपछि अन्तिम दिन बजार स्थिर देखिएको थियो । खतिवडाको बहिर्गमनसँगै सेयर बजार बढ्नेमा लगानीकर्ता आशातीत देखिएका छन् । नेप्से परिसूचक २ वर्ष ९ महिनाकै उच्च बिन्दु (१६३२) नजिक आइपुगेको छ ।
नेप्सेको मैनबत्ती चित्रले भने बजार लगानी गर्नुअघि आइतबारको पहिलो सत्रको कारोबार हेर्नु सही हुने संकेत गरेको छ । साताको अन्तिम दुई दिनमा पहिलो दिन डोजी स्टार र दोस्रो दिन कालो सानो शरीर भएको मैनबत्ती आकृति बनेको छ । यसले परिसूचकको आगामी गतिलाई लिएर लगानीकर्तामा अन्योल देखिएको संकेत गर्छ । यसले बजारको बढ्दो प्रवृत्ति परिवर्तन हुन सक्ने संकेत गरिरहेको छ । तर, यो दरिलो संकेत भने होइन । आइतबारको पहिलो सत्र हेरेर लगानी गर्नु सही हुनेछ ।
सातामा सेयर संख्या र रकमका आधारमा नेपाल पुनर्बिमा कम्पनीको सबैभन्दा धेरै कारोबार भयो । कम्पनीको २० लाख २४ हजार कित्ता सेयर किनबेच भएर १ अर्ब ७२ करोड रुपैयाँको कारोबार भयो । कारोबार संख्याका आधारमा एनआरएन इन्फास्ट्रक्चर डेभलपमेन्ट कम्पनीको धेरैपटक सेयर किनबेच भयो ।
गत साता बजारमा ३४ लाख ९१ हजार कित्ता सेयर थपिएको छ । सामुदायिक लघुवित्त बोनस र शिखर इन्स्योरेन्सको हकप्रद सेयर सूचीकरण भएको हो ।
