६० प्रतिशत प्रगति हुनुपर्ने समयमा पनि बुटवल–गोरुसिंगे सडक विस्तार आयोजना निर्माणको काम २८ प्रतिशत मात्रै भएको छ । ठेक्का सम्झौताअनुसार ३ कात्तिक ०८४ मा निर्माण सम्पन्न हुन करिब एक वर्ष मात्रै बाँकी छ । तर, यो अवधिमा आयोजनाको वित्तीय प्रगति २३ दशमलव ८७ प्रतिशतमा सीमित छ । अहिलेकै गतिमा काम हुँदा म्यादभित्रै काम सक्न चुनौतीपूर्ण छ ।
निर्माणका क्रममा आवश्यक नदीजन्य सामग्रीको अभाव, विद्युत्का पोल स्थानान्तरणमा भएको ढिलाइलगायतका कारणले आयोजनाको काम प्रभावित भएको बुटवल–गोरुसिँगे सडक विस्तार आयोजनाका सूचना अधिकारी इन्जिनियर अशोक पौडेलले जानकारी दिए ।
उनका अनुसार अहिले विशेषगरी कपिलवस्तु खण्डमा विद्युत्का पोल स्थानान्तरणको काम सुस्त छ । ‘विभिन्न कारणले समग्र निर्माण प्रगति कमजोर देखिएको छ,’ पौडेलले भने, ‘निर्धारित समयमै काम सम्पन्न गर्न अब निर्माणको गति बढाउन आवश्यक छ ।’ उनका अनुसार अहिले रुपन्देही खण्डमा दुई सय ४५ र कपिलवस्तु खण्डमा दुई सय १० जना कामदार दैनिक रूपमा निर्माणस्थलमा खटिएका छन् ।
१३ अर्ब ५५ करोडको ठेक्का, ५० किलोमिटर सडक विस्तार हुँदै
बुटवलदेखि गोरुसिँगेसम्मको करिब ५० किलोमिटर सडक विस्तार भइरहेको छ । निर्माणाधीन ५० किलोमिटर सडकलाई रुपन्देही र कपिलवस्तु गरी दुई खण्डमा विभाजन गरी एकसाथ निर्माण भइरहेको छ ।
सडक विस्तारका लागि चिनियाँ निर्माण कम्पनी सान्सी कन्स्ट्रक्सन इन्जिनियरिङ ग्रुप कर्पोरेसन र चितवनको आशिष निर्माण सेवा जेभीसँग ठेक्का सम्झौता भएको हो ।
सडक विस्तारका लागि १३ अर्ब ५५ करोड ६५ लाख ९६ हजार चार सय ४१ रुपैयाँबराबरको ठेक्का सम्झौता भएको आयोजनाले जनाएको छ । ०८१ कात्तिकमा तीन वर्षभित्र निर्माण सम्पन्न गर्ने गरी ठेक्का सम्झौता भएको थियो । त्यसपछि १० माघ ०८१ मा आयोजनाको शिलान्यास गरिएको थियो ।
