राष्ट्रिय स्वतन्त्र पार्टी (रास्वपा) बागलुङको सभापतिमा ढालेन्द्र माझी निर्वाचित भएका छन् ।
रास्वपाको प्रथम जिल्ला अधिवेशनअन्तर्गत शनिबार भएको मतदानमा रायमाझी ९३ मतसहित सभापतिमा निर्वाचित भएका हुन् । उनका निकटतम प्रतिस्पर्थी पुनम शर्माले ८२ मत पाएका थिए । २ सय २७ जिल्ला प्रतिनिधिमध्ये शनिबारको मतदानमा १ सय ८० जनाले मत खसालेका थिए ।
चार वर्षअघि गठन भएको तदर्थ समितिको उपसभापति माझी र हालै पार्टीमा प्रवेश गरेका शर्माबिच सभापतिका लागि प्रतिस्पर्धा भएको थियो ।
उपसभापतिमा खिमानन्द पौडेल विजयी भए । पौडेलले १ सय र प्रतिस्पर्धी देवु बुढाथोकीले ७५ मत पाए । सचिव पदमा लीलबहादुर खत्री १ सय १२ मत ल्याएर विजयी भए भने प्रत्यासी प्रकाश रिजालले ६५ मत पाए । सहसचिवमा हेमलाल उपाध्याय ८८ मत ल्याएर विजयी भए भने कमलप्रसाद खरेलले ८५ मत मात्र पाएका थिए ।
क्षेत्र नं १ संयोजकमा रामप्रसाद अधिकारी १ सय ९ मत पाएर विजयी भएका छन् । क्षेत्र नं २ को संयोजकमा हिमाल खत्रीले ९७ मत ल्याएर विजयी भए । सदस्यहरू भने यसअघि नै छनोट भैसकेका थिए ।
गत जेठमा गलकोटमा भएको अधिवेशनमा पुनम शर्माको अध्यक्षतामा सर्वसम्मत पदाधिकारी घोषणा गरिएको थियो । सहमतिको नाउँमा घोषणा गरिएको भनिए पनि त्यसविरुद्ध केन्द्रमा उजुरी परेपछि पुनः अधिवेशन घोषणा भएअनुसार शनिबार पदाधिकारीका लागि मतदान भएको हो ।
