आसन्न फागुन २१ गते हुने प्रतिनिधिसभा सदस्य निर्वाचनलाई शान्त, निष्पक्ष तथा भयरहित वातावरणमा सम्पन्न गराउने उद्देश्यले उदयपुर जिल्लामा सुरक्षा अनुगमन तथा निरीक्षण कार्य तीव्र पारिएको छ ।
जिल्लास्तरीय सुरक्षा समितिका अध्यक्ष एवं प्रमुख जिल्ला अधिकारी धर्मराज जोशीको नेतृत्वमा जिल्लाभर सुरक्षा निकायको संयुक्त टोलीले मतदानस्थल तथा केन्द्रहरूको अनुगमन गरिरहेको छ । अनुगमनका क्रममा राजनीतिक दल र उम्मेदवारहरूले निर्वाचन आचारसंहिता पालना गरे–नगरेको विषयमा विशेष ध्यान दिइएको जिल्ला प्रशासन कार्यालयले जनाएको छ । आचारसंहिता उल्लंघन भएको पाइएमा सम्बन्धित पक्षलाई तत्काल सचेत गराउँदै उल्लंघन नगर्न निर्देशन दिइँदै आएको प्रमुख जिल्ला अधिकारी जोशीले जानकारी दिए ।
उनका अनुसार हालसम्म जिल्लाका ४७ वटा मतदानस्थल र १४६ वटा मतदान केन्द्रको निरीक्षण तथा अनुगमन सम्पन्न भइसकेको छ । बाँकी मतदानस्थल तथा केन्द्रहरूको अनुगमनलाई अझ प्रभावकारी र तीव्र बनाइने उनले बताए ।
अनुगमन टोलीमा जिल्ला प्रहरी कार्यालय उदयपुरका प्रमुख प्रहरी उपरीक्षक राजन चापागाईं, सशस्त्र प्रहरी बल नेपाल नं. ५ हेडक्वार्टरका प्रमुख सशस्त्र प्रहरी उपरीक्षक श्याममणि ढकाल, राष्ट्रिय अनुसन्धान विभागका उपनिर्देशक तुलसी कट्टेल तथा नेपाली सेनाको पशुपतिप्रसाद गण, गाईघाटका सेनानी प्रमोद अधिकारीलगायत सुरक्षा निकायका उच्च अधिकारीहरूको सहभागिता रहेको छ ।
यस्तै, नेपाली सेनाले निर्वाचनलाई लक्षित गर्दै उदयपुरका आठवटै स्थानीय तहमा पेट्राेलिङ तथा गस्तीलाई तीव्र बनाएको छ। उदयपुर जिल्लामा दुईवटा प्रतिनिधिसभा निर्वाचन क्षेत्र रहेका छन् । निर्वाचन क्षेत्र नं. १ अन्तर्गत ३५ वटा वडा, ५२ मतदानस्थल र १६० मतदान केन्द्र रहेका छन् भने निर्वाचन क्षेत्र नं. २ अन्तर्गत ४० वटा वडा, ५१ मतदानस्थल र ११५ मतदान केन्द्र निर्धारण गरिएको छ ।
