शेरबहादुर खड्का स्मृति प्रतिष्ठान, बालकोटको आयोजनामा नवौँ शेरबहादुर खड्का स्मृति राष्ट्रिय महिला भलिबल प्रतियोगिता २३ देखि २६ पुससम्म हुने भएको छ । प्रतियोगितामा तीन विभागीयसहित पाँच टोलीको सहभागिता रहने प्रतिष्ठानका अध्यक्ष रञ्जन खड्काले जानकारी गराए । नेपाल प्रहरी, नेपाली सेना, एपिएफ, न्यु डायमन्ड युथ स्पोर्टस् र एभरेस्ट भलिबल क्लबले भाग लिने खड्काले बताए । सहभागी टोलीलाई दुई समूहमा विभाजन गरी लिग कम नकआउट आधारमा खेल खेलाइनेछ ।
बहुराष्ट्रिय पेन्ट कम्पनी केएनपी नेरोलेकको मुख्य प्रायोजनमा हुने प्रतियोगिताको विजेताले पाँच लाख र उपविजेताले दुई लाख ५० हजार रुपैयाँ जित्नेछन् । तेस्रो हुने टोलीले एक लाख २५ हजार रुपैयाँ पाउनेछ । विधागत उत्कृष्टलाई जनही २५ हजार दिइनेछ । प्रत्येक खेलको ‘प्लेयर अफ द म्याच’लाई १५ हजार रुपैयाँ दिइनेछ । उद्घाटनका अवसरमा एक राष्ट्रिय महिला खेलाडीलाई ५० हजार नगदसहित सम्मान गरिनेछ । सुरुका ६ संस्करणको उपाधि एपिएफले जितेको थियो । सातौँमा न्यु डायमन्ड च्याम्पियन बनेको थियो । प्रतियोगिताको साबिक विजेता नेपाल पुलिस हो ।
यसैबिच, नेरोलेकका कन्ट्री हेड मनोज मिश्र र प्रतिष्ठानकी संरक्षक गमली खड्काले मुख्य प्रायोजनसम्बन्धी सम्झौतापत्रमा पनि हस्ताक्षर गरेका छन् । प्रतिष्ठानका अध्यक्ष खड्काले हरेक खेलाडी र टेक्निकल टिमका सदस्यको पाँच लाख रुपैयाँबराबरको बिमा गरिएको बताए । महिला खेलाडीको सशक्तीकरण र क्षमता अभिवृद्धि गर्ने उद्देश्यसाथ प्रतिष्ठानले ०७२ देखि प्रतियोगिता आयोजना गर्दै आएको छ ।
