भैरहवाको गौतम बुद्ध अन्तर्राष्ट्रिय विमानस्थल (जिबिआइए)मा पहिलोपटक वाइडबडी विमानले व्यावसायिक उडान गर्ने भएको छ । कतार एयरवेजले आज (मंगलबार) ३०५ सिट क्षमताको वाइडबडी विमान एयरबस ३३० बाट भैरहवामा उडान गर्न लागेको हो ।
कतार एयरवेजले वाइडबडीबाट दोहा–भैरहवा–काठमाडौं–दोहा रुटमा दैनिक एउटा उडान गर्ने भैरहवा विमानस्थलका महाप्रबन्धक प्रताप तिवारीले बताए। दोहाबाट आएको कतारको वाइडबडी विमान दिउँसो २:४५ बजे भैरहवा अवतरण गर्ने तालिका छ। यो जहाज दिउँसो ४:४५ बजे काठमाडौंका लागि उड्नेछ भने काठमाडौंबाट ६:५५ बजे दोहाका लागि उडान गर्ने तालिका छ ।
कतारले १५ मंसिरसम्म भैरहवा उडानको अनुमति लिएको छ । अहिलेलाई कतारले भैरहवामा कुल १९ फ्लाइट गर्ने अनुमति पाएको नेपाल नागरिक उड्डयन प्राधिकरण (क्यान)ले जनाएको छ। कतार थपिएसँगै भैरहवामा अन्तर्राष्ट्रिय उडान गर्ने वायुसेवा कम्पनीको संख्या पाँच पुगेका छन् । अब भैरहवामा सातामा २४ वटा अन्तर्राष्ट्रिय उडान हुने महाप्रबन्धक तिवारीले बताए । भैरहवामा थाई एयर एसिया, जजिरा, फ्लाई दुबई, नेपाल वायुसेवा निगम (नेवानि) र कतारले उडान सुरु गरेका हुन्।
१८ कात्तिकदेखि थाई एयर एसिया र २४ कात्तिकदेखि जजिरा, फ्लाई दुबई र नेवानिले उडान सुरु गरिसकेका छन् । आज २७ कात्तिकदेखि कतार एयरवेजले पनि उडान सुरु गर्दै छ। कतारबाहेकका वायुसेवा कम्पनीले भने न्यारोबडीबाट उडान भर्न थालेका छन् ।
कतार एयरवेज र फ्लाई दुबईले सातामा सातै दिन उडान भर्नेछन् भने जजिराले सातामा तीन, नेवानिले सातामा पाँच र थाई एयर एसियाले सातामा दुई उडान सुरु गरेका छन्। अब भैरहवामा सातामा सातै दिन उडान हुने भएको छ। क्यानका अनुसार आइतबार, बुधबार शुक्रबार र शनिबार तीन–तीन उडान हुनेछन् भने सोमबार, मंगलबार र बुधबार चार–चार उडान हुनेछन् ।
