अखिल नेपाल फुटबल संघ (एन्फा)का वरिष्ठ उपाध्यक्ष वीरबहादुर खड्काले सातौँ दक्षिण एसियाली फुटबल महासंघ (साफ) महिला च्याम्पियनसिपको टिकट बिक्रीमा अनियमितता र भ्रष्टाचार भएको आरोप लगाएका छन् ।
अखिल नेपाल फुटलब संघ (एन्फा)ले टिकट बिक्रीका लागि गठन गरेको पाँच सदस्यीय समितिले आर्थिक नियमावली र कार्यविधिको उल्लंघन गर्दै अनियमितता र भ्रष्टाचार गरेको दाबी खड्काले गरेका हुन् । गत ११ र १३ भदौमा भएको एन्फा कार्यसमिति बैठकले सदस्य पुरुषोत्तम थापाको संयोजकत्वमा विकासनारायण श्रेष्ठ, प्रवीण यादव, सुरेश शाह र दामोदर भट्टराई (बद्री) सम्मिलित पाँच सदस्यीय समिति गठन गरिएको थियो ।
समितिले टिकट बिक्रीका लागि टेन्डर आह्वान गरेको थियो । ‘सातदिने सूचना निकाल्नु नै गलत कुरा हो । यो सात दिनमा पाँच दिन त चाडपर्व बिदा नै छ । समयसीमाभित्र एउटा मात्र कम्पनीले आवेदन दिएमा अर्को सूचना प्रकाशित गर्नुपर्नेमा सोही कम्पनीसँग सम्झौता गर्नु बदनियत देखिन्छ,’ खड्काले भने । माउन्ट एभरेस्ट स्पोर्टस् एन्ड इभेन्ट्स प्रालिले एन्फासँग ८० लाखमा प्रतियोगिताको टिकट बिक्री गर्ने ठेक्का पारेको थियो ।
