राजनीतिक दलदेखि पेसागत संगठन, मजदुर, युवा–विद्यार्थी, नागरिक अगुवा, लेखक, कलाकारले गाजा क्षेत्रको जनसंहारविरुद्ध सोमबार काठमाडौंमा प्रदर्शन गर्ने भएका छन् । इजरायलले गाजा क्षेत्रमा मच्चाएको जनसंहारविरुद्ध संयुक्त विरोध प्रदर्शन गर्दै लाजिम्पाटस्थित इजरायली दूतावासमा ज्ञापनपत्र बुझाउने संयुक्त अभियानको संयोजक श्याम श्रेष्ठले जानकारी दिए ।
सोमबार दिउँसो १ बजे शंखधर पार्कबाट संयुक्त विरोध प्रदर्शन गर्दै लाजिम्पाटस्थित इजरायली दूतावासमा ज्ञापनपत्र बुझाउने उनले बताए । ‘०६३ पछि पहिलोपटक नेपालका १० भन्दा ज्यादा ठूला–साना राजनीतिक दलहरू, बृहत् नागरिक आन्दोलन, पेसागत संगठन, मजदुर संघ, विद्यार्थी र युवा संगठन, संस्थाहरू, सामाजिक जीवनका लब्धप्रतिष्ठित व्यक्ति, लेखक–कलाकार एकजुट भएर शंखधर पार्कबाट संयुक्त विरोध प्रदर्शन गर्दै लाजिम्पाटस्थित इजरायली दूतावासमा ज्ञापनपत्र दिनेछौँ,’ उनले भने ।
गाजा क्षेत्रमा इजरायलले इतिहासमा नभएको चरित्रको जनसंहार मच्चाइरहेको उनले बताए । ‘एक वर्षयता ४४ हजारभन्दा ज्यादा प्यालिस्टिनीको हत्या भइसकेको छ । जसमध्ये झन्डै ७० प्रतिशत महिला र केटाकेटी छन् । हरेक घण्टा १५ जनाको हिसाबले प्यालिस्टिनीको हत्या भइरहेको छ । एक वर्षमा गाजा क्षेत्रका ८० प्रतिशत विद्यालय र झन्डै आधा घर तथा अस्पताल ध्वस्त भएको स्थिति छ । त्यस क्षेत्रमा लगाइएको खानेकुरा र जीवनरक्षक औषधिसमेतको कडा नाकाबन्दीका कारण अहिले गाजा क्षेत्रमा बम वर्षाबाट भन्दा ज्यादा नाकाबन्दीबाट धेरै सर्वसाधारण मानिस मर्ने स्थिति आएको छ,’ श्रेष्ठले भने ।
