नेपाली राष्ट्रिय यू–१९ क्रिकेट टोलीले बिहीबारबाट एसिया कप छनोट प्रतियोगिता खेल्दै छ । करिब एक महिनाको तयारीपछि नेपाली टोली एसिसी यू–१९ प्रिमियर कप खेल्न लागेको हो । त्यसका लागि टोली आज मलेसिया प्रस्थान गर्दै छ । मलेसिया प्रस्थान गर्नुअघि नेपाली टोलीका कप्तान तथा प्रशिक्षकले अपराजित रहँदै १६ टोली सहभागी प्रतियोगितामा च्याम्पियन भएर घर फर्कने योजना बनाएका छन् । प्रतियोगिताका हरेक खेल जित्दै जाने र उपाधिका लागि प्रतिस्पर्धा गर्ने उनीहरूले योजना सुनाएका छन् ।
कप्तान देव खनालले टोलीको तयारी राम्रो भएको र उपाधि जित्न खेल्ने बताउँछन् । ‘तयारी राम्रो भएको छ । उपाधि भित्र्याउन चाहन्छौँ,’ नयाँ पत्रिकासँग बोल्दै देवले भनेका छन् । देवको नेतृत्वमा नेपाली टोलीले समूह चरणमा बहराइन, साउदी अरेबिया र इरानसँग खेल्ने तालिका छ । नेपालले समूहको पहिलो खेलमा बिहीबार इरान, आइतबार बहराइन र अन्तिम खेलमा साउदी अरेबियासँग खेल्ने तालिका छ । चार समूहका १६ मध्ये उत्कृष्ट तीन टोली एसिया कपमा छनोट हुनेछन् । एसिया कपको समूह ‘ए’मा भारत र पाकिस्तान छन् । अर्काे समूहमा अफगानिस्तान, बंगलादेश र श्रीलंका छन् ।
प्रिमियर समूह चरणका तीनै खेल जितेर सेमिफाइनल पुग्ने नेपालको लक्ष्य छ । ‘मनोबल पनि उच्च छ । केही खेलाडीले भारतमा पनि प्रशिक्षण गरेका छन् । ब्याटिङ र बलिङ राम्रो छ । तीव्र गतिका बलरले झनै राम्रो गर्न सक्छन्,’ देव भन्छन् । उनले टेस्ट राष्ट्रसँग खेल्न परे पनि विनादबाब खेल्ने क्षमता रहेको बताएका छन् ।
गत वर्ष नै नेपालले सन् २०२४ को जनवरीमा श्रीलंकामा हुने विश्वकपमा स्थान सुरक्षित गरिसकेको छ । युएईमा उत्कृष्ट प्रदर्शन गरेपछि हाल टोलीको मनोबल उच्च छ । सोही खेलाडी नै यो टोलीमा छन् । देवको कप्तानीमा आकाश त्रिपाठी, अर्जुन कुमाल, दीपक बोहरा, उत्तम थापामगर, हेमन्त धामी, दुर्गेश गुप्ता, आकाश चन्द, दीपक बोहरा, सुवास भण्डारी, विशाल केसी, मिलन बोहरा, दीपक डुम्रे र दीपेश कँडेल टोलीमा छन् । घरेलु टोली युएई, सिंगापुर, हङकङ, मलेसिया र कुवेतलाई हराएर विश्वकपमा पुगेको टोलीले प्रिमियर कपको सेमिफाइनल र फाइनलमा यिनै टोलीसँग खेल्नुपर्छ ।
प्रशिक्षक जगत टमटा खेलाडी प्रतियोगिता जित्न पूर्ण तयार रहेको बताउँछन् । ‘शारीरिक, प्राविधिक र मानसिक रूपमा खेलाडी तयार छन् । विश्वकपपछि एसिया कप छनोट हुन खेल्छौँ,’ टमटाले भने, ‘ब्याटिङ र बलिङ राम्रो छ । पुरानै खेलाडी भएकाले तालमेल पनि उत्कृष्ट छ,’ उनले भने । प्रशिक्षक टमटाले सिनियर टोलीमा स्थान बनाउने मौका रहेकाले पनि खेलाडीलाई उत्कृष्ट प्रदर्शन गर्न अवसर रहेको बताएका छन् ।
नेपाली टोलीको बिदाइ
क्यानले काठमाडौंमा एक कार्यक्रमका बीच नेपाली टोलीको बिदाइ गरेको छ । राट्रिय खेलकुद परिषद् (राखेप) कार्यवाहक सचिव प्रकाश कुसारी, क्यान उपाध्यक्ष रोशन सिंह, सचिव पारस खड्का, कोषाध्यक्ष पदम खड्का, सदस्यद्वय दिवाकर घले र सुदीप शर्मा तथा सिजी फुड्सका सिइओ प्रदीप पुडासैनीलगायतले खेलाडीको बिदाइ गरेका हुन् ।
बिदाइ कार्यक्रममा बोल्दै सविच पारसले राष्ट्रिय टोलीबाट खेल्न सुनौलो अवसर रहेकाले प्रतियोगितामा उत्कृष्ट प्रदर्शन गर्न सबै खेलाडीलाई शुभकामना दिए । ‘उत्कृष्ट प्रदर्शन गर्दै राष्ट्रिय टिममा पुग्न सक्ने माध्यम हो । यो संरचनाको क्रिकेटबाट इतिहास बनाउन सकिन्छ । अवसर छ । उत्कृष्ट प्रदर्शन गर्नुहोला,’ पूर्वकप्तान खड्काले भने, ‘विश्वकपसँगै एसिया कप खेल्ने अवसर आएको छ । उच्च मनोबलका साथ खेल्नेमा विश्वस्त छु ।’
उपाधि जित्ने लक्ष्य छ
देव खनाल, कप्तान, यू–१९ क्रिकेट
तयारी धेरै राम्रो भएको छ । केही खेलाडीले भारतमा गएर पनि अभ्यास गरेका छन् । ब्याटिङ र बलिङ दुवै राम्रो छ । तीव्र गतिका बलरले सानदार प्रदर्शन गर्न सक्छन् । उत्कृष्ट तीनमा रहँदै एसिया कपमा छनोट हुन्छौँ । सबै खेल जित्दै च्याम्पियन भएर घर फर्कन्छौँ । सबै खेल जित्न सक्ने क्षमता छ । ट्रफी लिएर आउँछौँ । मानसिक रूपमा पनि तयार छौँ । कुनै दबाब छैन । यसमा राम्रो गरे अन्य खेलाडीलाई पनि सिनियर टोलीमा खेल्ने अवसर छ ।
सिस्टमलाई निरन्तरता दिन्छौँ
जगत टमटा, प्रशिक्षक, नेपाल
मानसिक, शारीरिक र प्राविधिक रूपमा तयार छौँ । सात वर्षपछि विश्वकपमा छनोट भएका छौँ । एसिया कपमा पनि छनोट हुन चाहन्छौँ । खेलाडी जित्न आतुर छन् । व्यक्तिगत तयारी पनि गरेका छौँ । २५ दिनको तयारी आशालाग्दो छ । छनोट त भइहाल्छौँ । च्याम्पियन हुने लक्ष्य हो ।देवले सिनियर टोलीबाट खेलिसकेको छ । त्यही सिस्टममा खेल्ने प्रयास गर्छौं । त्यसलाई निरन्तरता दिएर खेल्छौँ ।
