मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १५ बिहीबार
  • Thursday, 28 March, 2024
काखे छोरा च्यापेर २८ जेठमा वसन्तपुरमा अनशन बसेकी निहारिका
अनिल यादव काठमाडाैं
२०७९ कार्तिक १९ शनिबार ०६:१९:००
Read Time : > 3 मिनेट
फ्रन्ट पेज प्रिन्ट संस्करण

निहारिकाको बच्चा र आरोपित श्रेष्ठको डिएनए मिल्यो

Read Time : > 3 मिनेट
अनिल यादव, काठमाडाैं
२०७९ कार्तिक १९ शनिबार ०६:१९:००

उच्च अदालत जनकपुरकी प्रवक्ता नूतन झा भन्छिन्– ९९.९९९ प्रतिशत डिएनए म्याच देखियो

‘कुमारी आमा’को रूपमा चिनिएकी निहारिका राजपुत (सोनाली सिंह)को छोरा र उनले आरोप लगाउँदै आएका शिवराज श्रेष्ठको डिएनए मिलेको छ । उनीहरूको डिएनए ‘म्याच’ देखिएको रिपोर्ट शुक्रबार नेपाल विज्ञान तथा प्रविधि प्रज्ञा प्रतिष्ठानबाट उच्च अदालत जनकपुर पुगेको हो । 

निहारिकाले शिवराज श्रेष्ठले गरेको जबर्जस्ती करणीबाट छोरा जन्मिएको दाबी गर्दै आए पनि उनले भने अस्वीकार गरेका थिए । विवादित उक्त मुद्दा उच्च अदालत जनकपुरमा विचाराधीन छ ।

‘प्रतिवेदनमा ९९.९९९ प्रतिशत डिएनएन म्याच भएको देखिएको छ । डिएनए परीक्षणको परिणाम नआइसकेकाले अदालतले श्रेष्ठलाई साधारण तारेखमा छाडेको थियो । आउँदो २५ कात्तिकमा उनको तारेख छ । अब त्यही तारेखका दिन यो मुद्दाको सुनुवाइका लागि अर्को पेसी तोकिनेछ । सम्भवतः अब चुनावपछि मात्रै हुनेछ,’ उच्च अदालत जनकपुरकी प्रवक्ता नूतन झाले जानकारी दिइन् । 

महोत्तरी जलेश्वरकी निहारिकाको मागबमोजिम नै उच्च अदालत जनकपुरका न्यायाधीशद्वय भोजराज अधिकारी र रेखा थापा पाण्डेको संयुक्त इजलासले गत ८ भदौमा बालक र बलात्कार आरोपित श्रेष्ठको डिएनए परीक्षण गर्न आदेश दिएको थियो । आदेशबमोजिम गत २४ भदौमा दुवैको डिएनए परीक्षण भएको थियो । निहारिकाले आफूमाथि भएको जबर्जस्ती करणीमार्फत बच्चाको जन्म भएको भन्दै जाहेरी दिएकी थिइन् । तर, आरोपित श्रेष्ठले भने आफूहरूबीच प्रेम सम्बन्धका क्रममा सहमतिमै यौन सम्बन्ध भएको र बच्चा आफ्नो नभएको दाबी गर्दै आएका थिए । तर, डिएनए रिपोर्टले श्रेष्ठको दाबी झुटो साबित गरिदिएको छ । 

डिएनए म्याच भए पनि प्रतिवादी श्रेष्ठले अदालतबाट कानुनबमोजिम जेल सजाय नपाएसम्म आफूले न्याय नपाउने निहारिका बताउँछिन् । ‘मैले तीन वर्षदेखि आफ्नो बच्चाको डिएनए टेस्ट गराउनकै निमित्त ठूलो संघर्ष गरेँ,’ उनले भनिन्, ‘दुई वर्षसम्म अपराधी भाग्ने, एक्कासि आएर म निर्दोष छु भन्दै अदालत हाजिर हुने अनि अदालतले सफाइ दिने । अहिलेसम्म भएको यति नै थियो । सुरुदेखि नै डिएनए टेस्ट ‘म्याच’ भएन भने मलाई अपराधी करार गर्नू, म सजाय भोग्न तयार छु भनिरहेकी थिएँ । तर, म सडकमा गएर पटकपटक अनशन बसेपछि, आफूलाई राष्ट्रपति कार्यालयअगाडि पुगेर जलाउने अवस्थामा पुगेपछि मात्रै मेरो यो आवाज सुनियो । डिएनए मिलिसकेको अवस्थामा अब मलाई राज्यले अंश दिलाएर, नाता कायम गरेर या बिहे गराएर दिलाउने सोचेको छ भने त्यो मेरा लागि स्वीकार्य हुँदैन । मैले छोराको बाउ खोजेको होइन, अपराधीलाई कानुनबमोजिम सजाय खोजेकी हुँ । त्यसैले अपराधीलाई कानुनबमोजिम जेल सजाय भएन भने म चुप लाग्दिनँ ।’

जिल्ला अदालत धनुषाले जबर्जस्ती करणीको कसुरमा श्रेष्ठलाई सफाइ दिएपछि आफूमाथि अन्याय भएको भन्दै निहारिका पछिल्लो समय पटकपटक काठमाडौंमा दुधेबालक काखी च्यापेर अनशन बसेकी थिइन् । आफूलाई साथीकै दाइ धनुषा क्षीरेश्वरनाथ नगरपालिका– ३ का २३ वर्षीय श्रेष्ठले नशालु पदार्थ पिलाएर बलात्कार गरेको, तर त्यसबाट जन्मिएको बच्चा अस्वीकार गरेको आरोपमा निहारिकाले जबर्जस्ती करणीको मुद्दा दायर गरेकी थिइन् । निहारिका पहिलोपटक गत २७ जेठदेखि सात दिन आमरण अनशन बसेकी थिइन् । त्यतिवेला उनले आफ्नो बच्चाको डिएनएन परीक्षण गर्नुपर्ने, बलात्कारीलाई पुनः पक्राउ गरेर अनुसन्धान गरिनुपर्नेलगायत पाँचबुँदे माग राखेकी थिइन् । 

सरकारसँग न्यायको वाचासहित पाँचबुँदे सहमति भएपछि उनले अनशन तोडेकी थिइन् । त्यतिवेला राष्ट्रिय महिला आयोगको पहलमा गृहमन्त्री बालकृष्ण खाणले उनलाई जुस पिलाएर अनशन तोडाएका थिए ।

त्यतिवेला निहारिका र सरकार पक्षबीच प्रतिवादी शिवराज श्रेष्ठ र अनशनकर्ता निहारिकाका छोराको डिएनए परीक्षणको कानुनी प्रक्रिया अघि बढाउन पहल गर्ने, अनशनकर्ता र उनको छोराको सुरक्षा, आवास व्यवस्थापनका लागि गृह मन्त्रालय र महिला, बालबालिका तथा ज्येष्ठ नागरिक मन्त्रालयमार्फत पहल गर्ने, अनशनकर्ताको आर्थिक सहायताका लागि गृह मन्त्रालयमार्फत पहल गर्नेलगायत सहमति भएको थियो ।

तर, सरकारले त्यो सहमति कार्यान्वयन नगरेपछि र पहिलोपल्ट उच्च अदालत जनकपुरले तोकिएको पेसी पनि सारेपछि उनी दोस्रोपटक २२ साउनमा पुनः अनशन बसेकी थिइन् । त्यतिवेला सर्वोच्च अदालतअगाडि अनशनमा बस्दा प्रहरीले उनलाई बल प्रयोग गरेर नै हटाएको थियो । अनशनकै बीचमा उनले राष्ट्रपति कार्यालयअगाडि आत्मदाहको प्रयाससमेत गरेकी थिइन् । त्यतिवेला प्रहरीले उनलाई शरीरमा पेट्रोल खन्याइरहेको अवस्थामा उद्धार गरेर अस्पताल पु¥याएको थियो । त्यसपछि फेरि माग पूरा गर्ने सरकारको सहमतिपछि उनले अनशन तोडेकी थिइन् । लगत्तै उच्च अदालतले उनले अनशनका क्रममा राखेको मुख्य माग डिएनए परीक्षणलाई सम्बोधन गर्दै आदेश दिएको थियो । 

डिएनए नतिजापछि निहारिकाको माग– मलाई बच्चाको बाउ होइन, उसलाई कानुनबमोजिम सजाय चाहिएको हो

मैले तीन वर्षदेखि आफ्नो बच्चाको डिएनए टेस्ट गराउनकै लागि ठूलो संघर्ष गरेँ । दुई वर्षसम्म भागेको अपराधी एक्कासि आएर निर्दोष छु भन्दै अदालत हाजिर हुने, अनि अदालतले सफाइ दिने काम भयो । अहिलेसम्म भएको यति नै थियो । मैले सुरुदेखि नै डिएनए टेस्ट ‘म्याच’ भएन भने मलाई अपराधी करार गर्नू, म सजाय भोग्न तयार छु भनिरहेकी थिएँ । तर, म सडकमा गएर पटक–पटक अनशन बसेपछि, आफूलाई राष्ट्रपति कार्यालयअगाडि पुगेर जलाउने अवस्थामा पुगेपछि मात्रै मेरो आवाज सुनियो । डिएनए मिलिसकेको अवस्थामा अब मलाई राज्यले अंश दिलाएर, नाता कायम गरेर या बिहे गराएर न्याय हुने सोचेको छ भने त्यो मेरा लागि स्वीकार्य हुँदैन । मैले छोराको बाउ खोजेको होइन, अपराधीलाई कानुनबमोजिम सजाय खोजेकी हुँ । यत्रो वर्ष मसहित मेरो काखको बच्चालाई कुन बिजोग अवस्थामा हुर्काएँ हुँला, न त्यसको क्षतिपूर्ति नै हुन सक्छ, न कसैले महसुस नै गर्न सक्छ । त्यसैले अब अपराधीलाई कानुनबमोजिम जेल सजाय भएन भने म चुप लाग्दिनँ । अहिलेसम्म मेरो बच्चा होइन भनेर दाबी गर्नेको आज डिएनए परीक्षण मिल्यो । अब कानुनबमोजिम सजाय हुनुपर्छ ।