प्रदेश १ का स्वास्थ्यमन्त्री जयराम यादवले कार्यकक्षबाट राष्ट्रपति र प्रधानमन्त्रीको फोटो हटाएका छन् । पहिचानसहितको संघीयता कार्यान्वयनका लागि भन्दै मन्त्री यादवले आइतबार मन्त्रालयमा रहेको आफ्नो कार्यकक्षबाट राष्ट्रपति विद्यादेवी भण्डारी र प्रधानमन्त्री शेरबहादुर देउवाको फोटो हटाएका हुन् । 

मन्त्री यादवले राष्ट्रपति भण्डारीको फोटोको ठाउँमा प्रदेश १ का प्रमुख परशुराम खापुङ र प्रधानमन्त्रीको फोटोको स्थानमा प्रदेश १ का मुख्यमन्त्री राजेन्द्रकुमार राईको फोटो राखेका छन् । यसअघि उनले कार्यकक्षमा राष्ट्रपति, प्रधानमन्त्री, प्रदेश प्रमुख र मुख्यमन्त्रीको फोटो एकसाथ राखेका थिए । 

राष्ट्रपति भण्डारी र प्रधानमन्त्रीको फोटो हटाएपछि स्वास्थ्यमन्त्री यादवले सामाजिक सञ्जाल फेसबुकमा कारण प्रस्ट्याउँदै स्टाटस पनि सार्वजनिक गरेका छन् । उनले फेसबुकमा लेखेका छन्, ‘संघीय लोकतान्त्रिक गणतन्त्र नेपाल जिन्दावाद ! राष्ट्रपति र प्रधानमन्त्रीको फोटो हटाएर माननीय प्रदेश प्रमुख परशुराम खापुङज्यू र माननीय मुख्यमन्त्री राजेन्द्रकुमार राईज्यूको तस्बिर आजदेखि स्वास्थ्य मन्त्रालयमा स्थापित गरियो । पहिचानसहितको संघीय अभिवादन !’

नयाँ पत्रिकासँग प्रतिक्रिया दिँदै उनले राष्ट्रपतिको भूमिका पनि संरक्षकको जस्तो नभएको जिकिर गरे । ‘राष्ट्रपतिको भूमिका पनि संरकक्षजस्तो देखिएन । अनि प्रधानमन्त्रीले पनि संघीयता कार्यान्वयनमा उदासीनता देखाउनुभयो । भन्नलाई संघीयता भने पनि केन्द्रीयता नै हाबी भइरह्यो । त्यसैले मैले संघीयता प्रवद्र्धनका लागि कानुनअनुसार कार्यकक्षमा प्रदेश प्रमुख र मुख्यमन्त्रीको फोटो राखेको हुँ ।’

स्रोतका अनुसार आसन्न निर्वाचनका लागि प्रदेश सभाको सिट बाँडफाँडमा पार्टीका शीर्ष नेताहरू हाबी भएपछि मन्त्री यादव असन्तुष्ट छन् ।