सामुदायिक वनको संरक्षणको विशेष जिम्मेवारी बहन गर्नुपर्ने वन उपभोक्ता समूहका अध्यक्ष सिराहाको मिर्चैयाबाट अवैध काठसहित पक्राउ परेका छन् । सिराहाको मिर्चैया नगरपालिका ७ स्थित हरियोडाँडा सामुदायिक वन उपभोक्ता समूहका अध्यक्ष टीकाराम पोखरेल अवैध काठसहित पक्राउ परेका हुन् ।
पोखरेल स्वयंले तीनवटा आँपको गोलिया, खयर र विभिन्न जातको अवैध काठ लोड गरिएको स. १ त ३६०७ नम्बरको ट्याक्टर चलाएर मिर्चैया बजारतिर ल्याइरहेको अवस्थामा मिर्चैयास्थित सशस्त्र प्रहरी बल सुरक्षा बेस क्याम्पले नियन्त्रणमा लिएको हो । अवैध काठसहित पक्राउ गएिका पोखरेललाई आवश्यक कारबाहीका लागि लहानस्थित डिभिजन वन कार्यालयलाई बुझाइएको सशस्त्र प्रहरीले जनाएको छ ।
डिभिजन वन कार्यालयका निमित्त प्रमुख गंगाप्रसद यादवले ट्याक्टर, काठसहित अध्यक्ष पोखरेललाई पनि जिम्मामा लिइएको बताए । निमित्त प्रमुख यादवका अनुसार नियन्त्रणमा लिइएको काठ अहिलेसम्म नाप नभएकाले कति हो भन्ने यकिन भएको छैन ।
पक्राउ परेका पोखरेललाई मुद्दा चलाउन आवश्यक अनुसन्धानका लागि सिराहा जिल्ला अदालतबाट सोमबार नै म्याद थप गरिएको निमित्त प्रमुख यादवले बताए ।