- वि.सं २o८१ जेठ ५ शनिबार
कञ्चनपुरको पुनर्वास नगरमा एक जंगली हात्ती मृत फेला परेको छ । पुनर्वास नगरपालिका– २ अमरैया उखुबारीमा जंगली हात्ती मृत फेला परेको हो । केही दिनदेखि मानवबस्तीमै पसेको वयस्क हात्ती बुधबार दिउँसोतिर मृत फेला परेको सबडिभिजन वन कार्यालय, कुण्डा कञ्चनपुरले जनाएको छ ।
सबडिभिजन वन कार्यालय कुण्डाका प्रमुख दिनेश यादवले केही दिनदेखि उक्त पोथी हात्ती गाउँ पसेको बताए । ‘यो हात्ती आफ्नो बथानबाट छुट्टिएको थियो,’ उनले भने, ‘प्रारम्भिक अध्ययनबाट बिरामीले मृत्यु भएको देखिन्छ ।’ उनका अनुसार उक्त हात्ती अन्दाजी १० वर्षको रहेको छ । मृत हात्तीको दाहसंस्कार गरिने बताइएको छ । चार वर्षअघि पनि पुनर्वास क्षेत्रमा एक हात्ती मृत फेला परेको थियो ।
कञ्चनपुरमा पछिल्ला दिनहरूमा हात्ती र मानवबीच द्वन्द्व बढ्दै गएको छ ।
