मुख्य समाचार डिजिटल संस्करण

संखुवासभामा खोलाले बगाउँदा एकको मृत्यु, एक बेपत्ता 

संखुवासभाको सभापोखरी गाउँपालिका- ६ मा सभाखोलाले बगाउँदा एकजनाको मृत्यु भएको छ भने एकजना बेपत्ता  भएका छन्। शनिबार भाइटीकाको दिन बिहान  आठ वर्षीय विपन विश्वकर्मालाई खोलाले बगाउँदा मृत्यु भएको हो भने सँगै पौडी खेल्न गएका नाै वर्षीय ऋतिक विश्वकर्मा बेपत्ता भएको  जिल्ला प्रहरी कार्यलय संखुवासभाले जनाएको छ। 

उनीहरू सभापोखरी गाउँपालिकाको केन्द्र बाह्रबिसे बजारनजिकैको सभाखोलामा पौडी खेल्न गएका थिए। उनीहरूमध्ये विपनको शव करिब पाँच सय मिटर तल खोला किनारमा भेटिएको  प्रहरीले जनाएको छ। ऋतिक अझै बेपत्ता छन्। सभापोखरी– १ का ऋतिक सभापोखरी– ६ स्थित मावलीमा पाहुना गएका थिए। भाइटीकाको साइत भइसक्दा पनि उनीहरू घर नफर्किएपछि खोलामा खोज्न जाँदा खोला किनारमा लुगा फुकालिएको मात्र भेटिएको स्थानीयले बताएका थिए। त्यसपछि खोलाले बगाएको आशंका गरी प्रहरीलाई खबर गरिएको थियो। ऋतिकको पनि खोजी भइरहेको जिल्ला प्रहरी कार्यालयले जनाएको छ।