फ्रन्ट पेज प्रिन्ट संस्करण

२१ मध्ये १७ सांसद नआएपछि बैठक नै बसेन, ५० मिनेट कुरेर फर्किए कृषिमन्त्री

किसानको धानबाली क्षति भएको गम्भीर विषयमा छलफल गर्न डाकिएको कृषि समितिको बैठकप्रति सांसदहरूले नै रुचि देखाएनन्

कात्तिक पहिलो साता आएको वर्षा र बाढीका कारण धानबालीमा क्षति व्यहोरेका किसान मर्माहत अवस्थामा छन् । तीन दिनको बेमौसमी वर्षाले किसानको ११ अर्ब ८७ करोड मूल्यबराबरको बालीमा क्षति पुगेको सरकारकै तथ्यांक छ । तर, किसान र कृषिका मुद्दामा सरोकार राख्ने र सरकारलाई निर्देशन दिने जिम्मेवारी पाएको संसद्को कृषि, सहकारी तथा प्राकृतिक स्रोत समितिमै रहेका सांसद भने किसानप्रति गैरजिम्मेवार देखिएका छन् । 

धानबालीमै भएको क्षतिबारे छलफल गर्न आइतबार ११ बजे समितिको बैठक डाकिएको थियो । छलफलका लागि आमन्त्रित कृषिमन्त्री महिन्द्र राय यादव ११ः१० मै उपस्थित भए । मन्त्रालयका सचिव, उपसचिवलगायत कर्मचारी समयमै उपस्थित थिए । तर, २१ सांसदमध्ये १७ अनुपस्थित भएपछि कोरम नपुगेर बैठक नै स्थगित भयो । कृषिमन्त्री यादव ५० मिनेट कुरेर फर्किए । 

सभापति पूर्णाकुमारी सुवेदी भन्छिन्–शुक्रबारै जानकारी गराएको हो, तर आउनुभएन

मिटिङबारे हामीले शुक्रबार नै सबैलाई जानकारी दिएका थियौँ । सांसदहरू आउनुहोला भन्ने लागेको थियो । सातजना मात्रै आइदिएको भए पनि प्रतिनिधिसभा नियमावलीअनुसार दुईपटक स्थगित गरेरै भए पनि बैठक राख्थेँ, तर आउनुभएन । कसैले बिरामी छु भन्नुभयो, कोही जिल्लातिर जानुभएको रहेछ ।

बैठकका लागि समिति सभापति पूर्णाकुमारी सुवेदी तथा सदस्यहरू शान्ता चौधरी, दलबहादुर राना र भूपेन्द्र थापा मात्रै उपस्थित थिए । सुवेदी माओवादी र अन्य तीनैजना एमाले सांसद हुन् । तर, एमालेका सात, कांग्रेसका पाँच, माओवादीका चार र लोकतान्त्रिक समाजवादीका एक गरी १७ सांसद बैठकमा आएनन् । आधा घन्टासम्म कुर्दा सांसदहरू नआएपछि सभापति सुवेदीले बैठक नबस्ने घोषणा गरेकी थिइन् । त्यसपछि झन्डै २० मिनेटजति सभापति र मन्त्रीबीच अनौपचारिक कुराकानी भएको थियो । 

तीन दिनको बेमौसमी वर्षाले ११ अर्ब ८७ करोड मूल्यबराबरको धानबालीमा क्षति पुगेको सरकारको तथ्यांक छ । धानको उत्पादन १० प्रतिशतसम्म घट्ने र चामलको आयात झन् बढ्ने अनुमान छ । तर, यति गम्भीर र महत्वपूर्ण विषयमा बैठक राख्दासमेत सांसदहरूले चासो नदिनु किसान र कृषि क्षेत्रकै विडम्बना हो । समितिको बैठक बस्न नसकेकोमा मन्त्री यादवले पनि असन्तुष्टि पोखे । उनले भने, ‘बेमौसमी वर्षाले कृषिमा पारेको असरबारे छलफल गर्न बैठक बोलाइएको थियो । सरकारको तयारीबारे बोल्ने योजनामा थिएँ, तर बैठक नै बस्न सकेन । सरकारले गरेका काम जनप्रतिनिधिमुलक समितिलाई भन्न पाउनुपर्‍यो नि !’

सभापति सुवेदी बैठकमा उपस्थिति जनाउन सबै सदस्यलाई शुक्रबार नै जानकारी गराएको बताउँछिन् । ‘कहिलेकाहीँ व्यक्तिगत काम हुन्छन् । तर, मिटिङबारे हामीले शुक्रबार नै सबैलाई जानकारी दिएका थियौँ,’ उनले भनिन्, ‘कोही एक माननीयलाई ‘म नजाँदा के फरक पर्छ र’ भन्ने लाग्न सक्छ । तर, हरेकले त्यसरी सोचेपछि त समिति रित्तै हुन्छ । सांसदहरू आउनुहोला भन्ने लागेको थियो, सातजना मात्रै आइदिएको भए पनि प्रतिनिधिसभा नियमावलीअनुसार दुईपटक स्थगित गरेरै बैठक राख्थेँ, तर आउनुभएन । कसैले बिरामी छु भन्नुभयो, कोही जिल्लातिर जानुभएको रहेछ ।’

प्रतिनिधिसभा नियमावलीअनुसार गणपूरक संख्या नपुगी लगातार दुईपटक बैठक स्थगित भएमा तेस्रोपटक कम्तीमा एकचौथाइ सदस्यको उपस्थितिमा बैठक बस्न सक्छ । सोको जानकारी सभापतिले सभामुखलाई दिनुपर्छ । तर, समितिमा एकचौथाइ सदस्य पनि आएनन् । बैठक स्थगित भएपछि न सरकारको तर्फबाट ब्रिफिङ हुन पायो, न त समितिले सुझाव–निर्देशन दिन पायो । समितिले बैठकमा छलफल गरेर किसानहरूलाई पर्याप्त राहत उपलब्ध गराउन सरकारलाई निर्देशन दिने योजना बनाएको थियो । खासगरी साना किसानलाई क्षतिपूर्ति रकम बढाउन निर्देशन दिने तयारी थियो । सरकारले साना किसानलाई क्षतिको ६५ प्रतिशत, मझौलालाई ३० प्रतिशत, ठूला किसान र आंशिक क्षति भएकालाई २० प्रतिशत राहत दिने निर्णय गरेको छ । 

 बैठकमा  उपस्थित सांसद 
माओवादीकी पूर्णाकुमारी सुवेदी (सभापति) र एमालेका दलबहादुर राना, भूपेन्द्र थापा र शान्ता चौधरी ।
 बैठकमा अनुपस्थित सांसद
एमालेका घनश्याम खतिवडा, छविलाल विश्वकर्मा, पाल्देन छोपाङ गुरुङ, भूमिप्रसाद त्रिपाठी, राजबहादुर बुढाक्षेत्री, राधाकुमारी ज्ञवाली र शान्तिमाया तामाङ पाख्रिन  कांग्रेसका देवप्रसाद तिमल्सेना, नागेन्द्र कुमार, लालकाजी गुरुङ, सत्यनारायण शर्मा खनाल, सीतादेवी यादव माओवादीका शक्तिबहादुर बस्नेत, ओनसरी घर्ती, सुरेशचन्द्र दास र हरिबोल गजुरेल  लोसपाका चन्द्रकान्त चौधरी ।