- वि.सं २o८१ बैशाख ३१ सोमबार
नेपाली कांग्रेसका उपसभापति विमलेन्द्र निधिले कार्यकर्तालाई बाढीपहिरो र डुबान प्रभावितको राहत र उद्धारमा जुट्न आग्रह गरेका छन्। उपसभापति निधिले बेमौसमी वर्षापछिको बाढीपहिरो र डुबानले देशका विभिन्न भागमा धनजनको ठूलो क्षति पुगेको भन्दै कार्यकर्ता र स्वयंसेवकहरूलाई यस्तो आग्रह गरेका हुन्।
‘भित्र्याउन ठिक्क पारिएको धानबाली पनि भिजेर नोक्सान भएको छ। नदी तटीय क्षेत्रका बासिन्दा जोखिममा छन्। कतिपय ठाउँमा विद्युत्, टेलिफोन र हवाई सेवा पनि अवरुद्ध छ,’ निधिले सामाजिक सञ्जालमार्फत भनेका छन्, ‘यस्तो अवस्थामा बाढीपहिरो र डुबानबाट प्रभावित भएकाहरूलाई यथाशक्य चाँडो उद्धार र राहतको व्यवस्था मिलाउन तथा अवरुद्ध सेवा नियमित गर्नेतर्फ सक्रियता देखाउन सरकारको ध्यानाकर्षण गराउँदछु।’
साथै उनले बाढीपहिरो र डुबानको जोखिम क्षेत्रमा रहेकाहरूलाई आवश्यक सावधानी अपनाउनसमेत अपिल गरेका छन्।
