- वि.सं २०८१ बैशाख १६ आइतबार
काठमाडौंका स्थानीयवासीले वडाका तीनवटा स्थानमा भेरोसेल खोपको दोस्रो डोजको व्यवस्था गर्न सरकारसँग माग गरेका छन् । शनिबार काठमाडौं महानगरपालिका-१० स्थित रत्नराज्य माध्यमिक विद्यालयमा दोस्रो चरणको भेरोसेल खोप लगाउन पुगेका स्थानीयहरूले खोप लगाउन धेरैको बाँकी रहेको उल्लेख गर्दै हरेक वडाका तीनवटा स्थानमा खोप दिने व्यवस्था गर्न सरकारसँग माग गरेका हुन् ।
शुक्रबारबाट सुरु भएको खोप काठमाडाैँ महानगरपालिका-३२ वटै वडाको एक–एक स्थानबाट दिने व्यवस्था गरिएको छ । तर, दोस्रो चरणको भेरोसेल खोप लगाउन नपाएकाहरू धेरै भएकाले वडामा तीनवटा स्थान तोकी सबैले खोप लगाउन पाउने व्यवस्था सरकारले गर्नुपर्ने स्थानीय ताराबहादुर खड्काले माग गरे । उनले भने,'धेरै बाँकी छन्– भेरोसेल खोपको दोस्रो डोज लगाउनेहरू । एउटा वडामा तीनवटा ठाउँ तोकी सबैले खोप लगाउन पाउने व्यवस्था सरकारले गरिदिए अझै राम्रो हुने थियो । खोप सहज ढंगले लगाउन पाएकोमा सरकारलाई धन्यवाद ।’
