जसपा अध्यक्ष महन्थ ठाकुरले आफूहरूलाई सत्ता जोगाउनका लागि मात्र प्रयोग गरिएको गुनासो गरेका छन् । प्रधानमन्त्री शेरबहादुर देउवाले राखेको विश्वासको मत लिने प्रस्तावमाथिको छलफलको क्रममा ठाकुरले सत्ताको खेलमा आफूलाई पार्ने गरिएको गुनासो गरे ।
प्रधानमन्त्री देउवालाई विश्वासको मत दिने भन्दै ठाकुरले तत्कालीन प्रधानमन्त्री केपी ओलीले आफ्ना केही माग सम्बोधन गरेको भन्दै धन्यवाद दिए । विशेषगरी नागरिकता अध्यादेश जारी गरेकोमा ठाकुरले ओलीलाई धन्यावाद दिएका हुन् ।
मधेसका नागरिक नागरिकताबाट वञ्चित भएको उनले बताए । मधेसका अधिकार स्थापित गर्ने सवालमा ठूला दल चुकेको पनि उनले गुनासो गरे ।