- वि.सं २o८१ बैशाख ३० आइतबार
११ वर्ष अघिदेखि निर्माण सुरु भएको सिँगटी–लामोसाँघु १३२ केभी प्रसारणलाइन पूरा भई बिहीबारबाट सञ्चालनमा आएको छ । झन्डै एक महिनाअघि निर्माण सम्पन्न भएको सिँगटी–लामोसाँघु प्रसारणलाइन सबै परीक्षणपश्चात् बिहीबार बेलुकीबाट सञ्चालनमा आएको हो ।
ठेकेदार कम्पनीको बेवास्ताले ११ वर्षदेखि अलपत्र रहेको प्रसारणलाइन बल्ल पूरा भएको हो । प्रसारणलाइन निर्माण पूरा भएसँगै दोलखाको उत्तरी क्षेत्रमा निर्माण सम्पन्न भएका र निर्माणाधीन निजी क्षेत्रले उत्पादन गर्ने विद्युत् राष्ट्रिय प्रसारणलाइनमा जोडिने भएको छ ।
प्रसारणलाइनको सिंगल सर्किट बिहीबार बेलुका चार्ज गर्ने काम पूरा भएको आयोजनाले जनाएको छ । प्रसारणलाइन सञ्चालनमा आएसँगै दोलखाको उत्तरी क्षेत्रमा निर्माण सम्पन्न भएका जलविद्युत् आयोजना उक्त लाइनमार्फत नेसनल ग्रिडमा जोडिने भएका हुन् ।
प्रसारणलाइन निर्माण आयोजनाका आयोजना प्रमुख राजन ढुंगेलले सबै संरचनाको सफल परीक्षणपछि बिहीबारबाट सञ्चालनमा आएको जानकारी दिए । निर्माण पूरा भएका केही टावरमा प्रोटेक्सनको काम सम्पन्न भएको र इन्सुलेसन टेस्टिङको कामसमेत पूरा गरी लाइन चार्ज सुरु गरिएको आयोजना प्रमुख ढुंगेलले बताए ।
यसअघि केही ठाउँमा लाइन क्लियर गर्ने समस्याका कारण पनि केही दिन ढिलो भएको र बीचमा नेपाल प्राधिकरणको व्यवस्थापन तहसँगको सहकार्यमा प्रसारणलाइन सञ्चालनमा ल्याइएको उनले जानकारी दिए ।
